Paltog, balbala, nakumpiska iti search operation

NARVACAN, Ilocos Sur – Maysa a paltog ken pinullo a bala ti nadumaduma a kalibre ti paltog ti nasamsam dagiti operatiba iti insayangkatda a search operation iti maysa a pagtaengan iti Barangay Banglayan ditoy nga ili idi agsapa ti Mayo 14.

Imet dagiti nagtitipon nga elemento ti ISCIDG, Narvacan Police Station, HPG, PIB ken Maritime Group ti search warrant nga inyisio ni Judge Renato Pinlac ti Regional Trial Court, Branch 57, San Carlos City, idi sinukisokda ti pagtaengan ni Felicisimo Javier, Jr. y Caabay, 47, ken residente iti nadakamat a barangay idi 6:00 ti bigat ti Mayo 14.

Nakumpiska dagiti operatiba iti balay ni Javier ti maysa nga Armscor Caliber .45 pistol nga addaan SN: 1158468; 4 magazines para Caliber 45 pistol; 17 rounds ti live ammunition para Caliber 45; 2 bala para caliber 60; 2 live ammunition para Caliber 9mm; 2) para Caliber 40; ken maysa a live ammo para Caliber 5.56.

Naipan ni Javier agraman dagiti nakumpiska iti balayna iti ISCIDG para iti umisu a disposision.

Kabayatanna, sabali met a search operation ti insayangkat ti nagtipon nga elemento ti CIDT Ilocos Sur ken ti Burgos Municipal Police Station iti balay ti maysa a Rodolfo Dato y Balanca iti Barangay Dirdirig, Burgos, Ilocos Sur idi agarup 3:30 ti malem ti Mayo 14.

Nakakumpiska dagiti operatiba iti balay ni Dato iti maysa nga Armscor, Caliber 45,, nga addaan serial number 1285729, maysa a magazine ti cal. 45 ken 6 rounds ti live ammunition ti cal. 45.

Naipan ti suspek ken dagiti nakumpiska kenkuana iti Ilocos Sur Police Provincial Office, Bulag, Bantay, Ilocos Sur para iti naing-inget nga inbestigasion ken dokumentasion.#