Paltog, insuko ti barangay kapitan

BURGOS, Ilocos Sur – Maysa a homemade cal. 38 revolver nga awanan serial number ti insuko ti barangay kapitan ti Manaboc ditoy nga ili idi aldaw ti Mayo 16.

Mismo a ni Barangay Captain Rose Bier ti nangisuko iti nasao paltog iti police station ditoy a kunana a narekobre ti maysa a barangay tanod bayat ti panagpatroliada idi agarup 9:00 ti rabii ti Mayo 15.

Mapapati nga impalladaw dagiti di nabigbig a tattao a naglugan iti motorsiklo ti nasao a paltog sada nagpakaskas a nagturong iti amianan a direksion idi pinadas dagiti tanod a pasardengen ida para iti routine check-up.

Naipaima ti naisuko a paltog iti Crime Laboratory Field Office, Candon City para iti umisu a disposision.#