NARVACAN, Ilocos Sur – Nakakumpiska dagiti pannakabagi ti polis  iti maysa a paltog ken nadumaduma ti klaseda a bala iti insayangkatda a panagsukisok iti maysa a pagtaengan iti barangay Dinalaoan, ditoy.

Nakaala ti raiding team nga indauluan ni PCI Ricarte Marquez iti pagtaengan ni Pedro Cabaccang, residente iti nasao a barangay iti maysa a kalibre 45, Colt, Mark IV, addaan serial number 916423; 2 a magasin ti kalibre 45; 12 a bala ti kal. 45; tallo a bala ti 9mm; 4 a bala ti kalibre 38; 2 a short magazine ti M16; 100 a bala ti M16; ken maysa a holster.

Iggem dagiti nagsukisok ti search warrant nga inyisio ni Judge Francisco Ante, Jr. ti MCTC, Vigan.

Naipan ti paltog ken bala iti opisina ti CIDG idinto a maisagsagana metten ti kaso maikontra ken ni Cabaccang.