Paltog, nadumaduma a balbala, nakumpiska iti search operation

STA. CATALINA, Ilocos Sur – Nakakumpiska dagiti polis iti paltog ken nadumaduma a bala iti insayangkatda a panagsukisok iti balay ti maysa a residente iti Barangay Cabittaogan, ditoy nga ili idi agsapa ti Septiembre 26.

Imet dagiti nagtitipon nga elemento ti ISPPSC nga indauluan ni PSupt. Jonathan Calixto, PIB nga indauluan ni PCI Randolf Beniat, POPB iti panangidaulo ni PCI John F. Charongen, WCPD iti panangidaulo ni PI Beverly Magastino, PIDMB ken ti polis-Sta. Catalina nga indauluan ni PSI Rodel U. Ularte babaen ti direkta a superbision ni PSupt. Jemar Delgado Modequillo ti Search Warrant No. 3 idi insayangkatda ti search operation iti aglawlaw ken balay ni Juan Apostol, Jr., 50, naasawaan, ken residente iti nadakamat a barangay.

Nakakumpiska dagiti nagsukisok iti balay ni Apostol iti maysa a carbine wenno cal. 30 MI; nadumaduma a balbala para iti carbine, M14, cal 25, cal 32, cal. 38, cal 45 ken M16; long magazine para M16; 2 short magazines ken maysa a long magazine para carbine; spring, ken spare part iti paltog.

Naisayangkat ti operasion iti sanguanan da Barangay Captain Narciso Rabang ken Barangay Kagawad Guillermo Raguindin, ken reporters ti Bombo Radyo, Vigan City.

Naipan dagiti nakumpiska nga items ken ti suspek iti police station para iti umisu a disposision ken iti pannakaisaklang iti maikanatad a kaso maikontra kenkuana.#