Paltog, naipalladaw iti irrigation canal

BURGOS, Ilocos Sur – Iti baet ti kampania ti kapolisan kontra loose firearms, adda latta dagiti natured nga agikuyog iti kolorum a paltogda iti panagrekoridada iti rabii.

Bayat ti panangiwayat dagiti polis iti checkpoint iti national road a sakup ti Barangay Poblacion Norte, Burgos, Ilocos Sur idi agarup 1:45 ti agsapa ti Oktubre 30, maysa a motorsiklo ti kellaat a nagsardeng iti agarup 50 metros manipud iti checkpoint.
Idi immasideg dagiti polis, dagus a nagbuelta ti di nabigbig a motorista sa nagpakaskas nga immadayo.

Kinamat dagiti polis ket idi makadanonda iti Barangay Lucaban, adda imbato ti drayber iti kanal.

Intuloy dagiti polis a kinamat ti motorista ngem saanda a nakamatan.

Idi sukimaten dagiti polis ti kanal, nakitada ti maysa a cal. 38, nagkarga iti dua a bala ken awanan iti serial number.#