Paltog, naisubli kadagiti barangay kapitan

STO. DOMINGO, Ilocos Sur – Naisubli met laengen kadagiti barangay captains dagiti paltogda a naiyawat iti police station para iti pannakaidulinda bayat ti panagkakampania iti eleksion idi 2010.

Naammuan ti Tawid News Magasin a naibilinen ni PI Honesto Lazo, Jr., hepe ti polis ditoy, iti property custodian ti panangisublina kadagiti nadakamat a paltog ket naiteden kadagiti dadduma a barangay kapitan.

Nupay kasta, mapapati nga adda pay dagiti barangay kapitan a saan a nakapasubli iti paltogda.

Segun iti hepe ti polis, naited ti go-signal kas panagtungpal iti pammilin nga impaulog ni Provincial Director Eduardo Dopale, Jr. a maisublin dagiti paltog kadagiti barangay kapitan.

Bayat ti panagkampania idi 2010 elections, nagreklamo ni dati a Congressman Mariano Tajon iti provincial command gapu iti pannakaited dagiti nasao a paltog kadagiti barangay captains gapu ta nasaklawda iti election gun ban ken iti posible a pannakaaramat dagiti armas iti eleksion.

Kinasango ni Tajon iti dayta nga eleksion para iti kinamayor ti Santo Domingo ni agdama a Mayor Lito Tadena, kabsat ni Mayor Floro “Butch” Tadena a nagalus-os a nagkandidato para bise mayor agsipud ta naungpotnan ti tallo a nagsasaruno a terminona.

Gimmatang ti gobierno munisipal iti paltog dagiti barangay captains babaen ti kiddaw ti Association of Barangay Captains nga indauluan ni ABC President Ernesto Tadeja para iti pannakatagiben ti urnos ken talna iti sakupda a barangay.#