Footer

Paltog, naisuko

MAGSINGAL, Ilocos Sur – Maysa a paltog ti insuko ti kapitan ti Barangay Miramar ditoy nga ili iti polis itay nabiit.

Mismo a ni Barangay Captain Arnel Renon ti nadakamat a barangay ditoy nga ili ti nangisuko iti cal. 45 pistol nga addaan iti magasin a nagkarga iti innem a bala iti Magsingal police station idi agarup 8:07 ti bigat ti Marso 1.

Segun ken ni Renon, insuko kenkuana ti kalugaranna a ni Jerry Tadeja ti nasao a paltog a mapapati nga inagawna  manipud ken ni Roberto Garcia bayat ti panagsubangda iti malem ti Pebrero 27 iti nadakamat a barangay.

Kabayatanna, dua a rifle grenades ti insuko ni Danilo Ibrao y Tubera, 56, naasawaan, chief tanod iti Barangay Pacis, Sinait, Ilocos Sur bayat ti pulong-pulong nga inangay ti kapolisan ti Sinait iti Barangay Pacis idi malem ti Pebrero 27.

Segun ken ni Ibrao, nasarakanna dagiti grenade rifles iti kabakiran a paset ti barangayda.#