Paltog, naisuko

STA. LUCIA, Ilocos Sur – Maysa a revolver ti insuko dagiti barangay officials ti Pila East ditoy nga ili iti polis a mapapati nga ikut ti maysa a kabarangayanda bayat ti insayangkatda a kumprontasion kenkuana idi malem ti Septiembre 23.

Idi insukoda iti polis ti Cal. 22 revolver (homemade paltik), kinuna ni Barangay Captain Alfredo Tan nga insuko kadakuada ni Jeremy Sabado y Gonzaga, 25, baro, construction worker, kalugaranda.

Sakbayna, idi rabii ti Septiembre 22, nagprobokar ni Sabado iti balayda ket mapapati a nagdadael kadagiti sanikua.

Kabigatanna, naangay ti kumprontasion iti opisina ni Tan ket bayat ti kaadda ni Sabado iti uneg ti opisinana, nasukalanda nga adda ikut daytoy a paltog.

Segun ken ni Tan, kinumbinsirda ni Sabado a mangisuko iti paltogna ket nagtungpal met daytoy.#