Paltog, naisuko

STA. LUCIA, Ilocos Sur – Maysa a homemade gauge 12 shotgun ti naisuko iti police station ditoy.

Insuko ni Damacuag Barangay Captain Brigido Hafalla a kinuyog ni ABC President Rosendo Acosta ti nasao a paltog idi agarup 11:30 ti Enero 6 a kinunana a  boluntario nga insuko ti maysa nga Apolinario Encarnacion, naasawaan, mannalon ken kalugaran ti barangay captain, idi agarup alas 8:00 ti bigat iti dayta met la a petsa.

Awan ti bala ti nasao a paltog ken awanan pay iti aniaman a marka.

Segun iti kapitan, nasarakan ni Encarnacion ti nasao a paltog iti dalan iti asideg ti kamaisan a nalabsanna iti panaggawidna.

Adda itan ti paltog iti kustodia ti municipal police station ditoy para iti umisu a disposision.#