Paltog, nakumpiska dagiti polis iti tupadaan

SAN ESTEBAN, Ilocos Sur – Nakakumpiska dagiti polis iti bag a naglaon iti paltog idi napanda rinaut ti maysa a tupada sadiay Barangay Apatot ditoy nga ili idi malem ti Agosto 15.

Nagresponde dagiti polis idi makaawatda iti report manipud iti maysa a maseknan nga umili nga adda maar-aramid nga illegal a pallot wenno kullangat iti kataltalonan iti nasao a barangay.

Ngem sakbay a makaasideg dagiti polis, nagtatarayen dagiti lallaki nga agpapallot iti nadumaduma a direksion.

Iti inspeksion nga inwayat dagiti polis iti pagpallotan, nakakitada iti maysa a box a mapapati a nabati ti maysa kadagiti agpapallot.

Idi sukimaten dagiti polis ti linaon ti box, maysa gayam a cal. 38 a paltog nga addaan iti innem a bala iti chamberna.

Naipan iti paltog iti police station para iti dokumentasion sakbay a maisubmite para iti pannakaamirisna iti PNP Crime Laboratory.#