Footer

Paltog, nakumpiska dagiti polis iti videoke bar

CANDON CITY – Nakaumpiska dagiti polis ditoy siudad iti paltog iti ikut ti maysa a lalaki bayat ti insayangkatda nga Oplan Bakal iti videokean iti Barangay Paras idi rabii ti Mayo 21.

Nakumpiska iti ikut ni Warren Villalobos y Ragas, 33, naasawaan, ken residente iti Barangay San Nicolas, Candon City, ti maysa a cal 45 nga addaan magasin nga awan ti naggian a bala ket inaresto dagiti polis kalpasan nga awan ti maipakitana a lisensiana.

Insayangkat dagiti polis ti panagrikisa kalpasan a nakaawatda iti tip manipud iti guardia ti New Survive Videoke Bar nga adda nakitana a lalaki nga adda sakbitna a paltog.

Pinanggep ti suspek nga ipasa ti paltog iti maysa a babai ngem nasiputan dagiti pannakabagi ti linteg.

Maipakpakat ti gun ban iti intero a probinsia maigapu iti special election a maangay iti umuna a distrito ti Ilocos Sur.#