Paltog, nakumpiska iti ikut nabartek a lalaki

STO. DOMINGO, Ilocos Sur – Maysa a homemade paltik ti nakumpiska iti maysa a nabartek a lalaki sadiay Barangay Nanerman ditoy nga ili idi malem ti Hulio 7.

Segun iti report manipud iti polis ditoy, madama ti panagmimiting dagiti barangay tanod babaen ti superbision ni Barangay Captain Elmer Tabangcura idi simmangpet iti agarup 6:40 ti malem ni Redentor Tabin y Ramos, 29, naasawaan, caregiver, ken residente iti Barangay Suksukit, ditoy met laeng nga ili, ket riniribukna ti session.

Imballakad ti maysa a tanod nga aggawiden ti suspek.

Sumagmamano a minutos kalpasanna, nagsubli manen ti suspek ket riniribukna ti miting a puon ti nangrikisaan ni Tabangcura kenkuana a nakasukalanna nga adda ikut daytoy a cal. 22 nga addaan iti siam a bala iti cylinderna.

Kinumpiska ni Tabangcura ti paltog sana impaima ti suspek kadagiti naayaban a polis.#