Paltog, nakumpiska iti kustomer iti videoke bar

NARVACAN, Ilocos Sur – Kinumpiska dagiti polis ditoy nga ili ti maysa a paltog nga ikut ti kustomer iti maysa a videoke bar idi agarup alas 11:30 ti rabii ti Enero 22.

Maysa a report ti naawat dagiti polis ditoy manipud iti maysa a di nabigbig nga umili nga adda nakitana a lalaki iti uneg ti Amigos Videoke Bar a masarakan iti Barangay Sta. Lucia ditoy nga ili nga adda ikutna a paltog.

Dagus a nagturong dagiti polis iti nasao a lugar ket kinumpiskada ti cal .45 a paltog nga addaan magasin ken nagkarga iti tallo a bala manipud iti ikut ni Jeffrey Cantil y Cabuloy, 18, baro, ken residente iti Barangay Estancia, ditoy nga ili.

Naipan ti suspek iti Central Ilocos Sur District Hospital para iti medikal nga eksaminasion sa iti police station para iti umisu a disposision.#