VIGAN CITY – Naireport iti polis a natakaw ti maysa a paltog tallo a bulan kalpasan a mapapati a natakaw manipud ti compartment ti motorsiklo ti akinkukua.
Segun ken ni Arnulfo Manzano y Rosario, residente iti Barangay Raois ditoy siudad, natakaw pay la idi Pebrero daytoy a tawen ti paltogna a Cal. 45, Armscor.
Kinuna ti biktima nga inkabilna ti paltogna iti compartment ti motorsiklo sana imparking iti amianan a paset ti tiendaan publiko ditoy siudad ket immuneg iti tiendaan ta adda apanna gatangen.
Naduktalanna laengen a naporsar a naluktan ti compartment ti luganna ket awanen ti paltogna.
Saan a nadakamat iti blotter no apay a napalabas ti tallo a bulan sakbay nga inreport ni Manzano a natakaw ti paltogna.#