Paltog ti dati a barangay captain, natakaw

TAGUDIN, Ilocos Sur – Nagreport iti polis ti maysa a dati a barangay captain ti Magsaysay ditoy nga ili a mapukpukaw ti paltogna ket suspetsana a tinakaw ti agtartaraken dagiti paratadi a manokna.

Iti pulongna iti polis, kinuna ni George Competente Lemi, 55, naasawaan, dati a barangay captain, ken residente iti Barangay Magsaysay, a dina masapulan ti paltogna a cal. 45 pistol nga agpasonto ti lisensiana inton Disiembre 18, 2016 iti nakaidulinanna ket suspetsana nga innala ni August Soreno, agtawen iti 55 agingga iti 60, naasawaan, ken mapapati a taga-Bisayas ngem agnanaed iti Caloocan, Metro Manila.

Kinuna ni Competente nga idi agarup 5:00 ti malem ti Hunio 8, napan iti talonna a masarakan iti Barangay Magsaysay tapno pakanenna dagiti paratadi a manokna ket bayat ti panagtarimaanna iti tolda, naduktalanna nga awan ti paltogna nga inkabilna iti maysa a box.

Suspetsa ni Competente a linibas nga innala ni Soreno ti paltogna agsipud ta daytoy laeng ti nagiggem iti tulbek iti sumrekan iti talonna.

Segun ken ni Competente, idi naggawid manipud iti Manila idi agarup 5:30 ti malem ti Hunio 2, naggawid met ni Soreno iti Manila ket saanen a nagsubli pay.#