Paltog ti mediaman, natakaw

NARVACAN, Ilocos Sur – Natakaw ti bag ti maysa a mediaman a naglaon iti paltog a naibati iti patrol jeep iti mismo a sanguanan ti balay ti mayor ditoy nga ili malem ti Agosto 18.

Babaen iti tawag iti telepono, inreport ni Joselito Javier y Parado, 42, anaunser iti Bombo Radyo, Vigan City, ken residente iti Barangay Cabaroan, Sta. Catalina, Ilocos Sur, iti polis a natakaw ti paltogna a Medallion Caliber 45 pistol Armscor nga addaan serial number 122797 a nakalisensia iti babaen ti numero 84529611694780 with control number I-C252260.

Agpaso ti paltog inton Septiembre 22, 2016.

Iti panagimbestiga dagiti polis, imparking da Javier ti Isuzu patrol jeep iti sanguanan ti pagtaengan ni Mayor Zuriel Zaragoza a masarakan iti Barangay San Jose, sada pinanawan ti lugan tapno mapanda kainnuman ti mayor iti municipal building.

Mapapati nga imbati ni Javier ti slig bagna a nakaikabilan ti paltogna iti uneg ti dyip.

Natakuatan laengen ni Javier nga awanen ti paltogna iti bag idi aggawidda.

Idi awan a masapulanna ti paltog, kabigatanna, inreport ni Javier ti insidente iti polis.
Iti pannakaisurat daytoy, di pay ammo no asino ti nangsikuat iti paltog ti mediaman.#