Pamadasan laeng

NAGBAW-ING ni Pres. Arroyo iti imbalikasna a suportaranna ti gakat a mangpasubli iti Anti-Subversion Act kalpasan ti irurukkuas dagiti timek a mangkontra iti dayta a panggep ti gobierno ken ti armada ti pagilian ngem saan a maikkat ti suspetsa nga impatayab ti Presidente dayta a kapanunotanna kas pamadasan no ania ti reaksion dagiti tattao.

Iti panagbitlana iti Lokal Peace and Security Assembly, dinakamat ni Presidente Gloria Macapagal-Arroyo ti panangidatag ni Diputado ti Sorsogon Jose Solis iti gakat a mangpasubli iti Anti-Subversion Act ket impatalgedna ti ikakanunongna no adda pannuporta ti LPSA.

“Okay kaniak, no okay iti assemblea,” dagitoy ti imbalikas ni Pres. Arroyo.

Insilpo met ni AFP Chief Hermogenes Esperon a kasapulan ti Anti-Subversion Law tapno naan-anay ti pannakapugipog dagiti grupo a kabusor ti turay.

No apay a kayat ti turay ken ti AFP a mapasubli ti Anti-Subversion Act ti saan a maawat dagiti tattao. Ta no ar-arigen, naikalin dayta a linteg kalpasan ti panang-repeal ni Pres. Fidel Ramos idi 1992, Madakamat ditoy a  naibilang a legal ti gunglo dagiti  komunista ken kumankannigid a grupo no la ketdi idiandan ti panggepda a mangpadisi iti turay babaen ti armas ket makipasetda a makipaggamulo iti turay iti natalna a wagas.

Iti sabali a bangir, impakdaar dagiti opisial ti militar a kimmapsuten ti insurhensia kalpasan dagiti opensiba nga inwaywayat dagiti tropa ti gobierno.

Iti panangisingasingda iti pannakaisubli ti Anti-Subversion Law, maysa la ketdi a panangannugot a di pay naparukma dagiti rebelde a grupo ket addaan pay laeng dagitoy iti kapabilidad a mangriribuk kadagiti nasulinek a lugar iti pagilian.

Maysa pay a kaadda iti reserbasion iti pannakaisubli ti Anti-Subversion Act dagiti mapaspasamak nga extra-judicial killings a nakapapatayan dagiti lider ti mapapati a kumankannigid a grupo a kangrunaan a maitudtudo dagiti kameng ti militar. Nainget a pinaglibakan daytoy dagiti opisial ti militar ken ti gobierno ket intudoda dagiti NPA nga adda iti likudan dagiti pammapatay.

Iti met report ni Philip Alston, rapporteur ti United Nations mainaig iti human rights, imbatadna a nakatudo ti istratehia ti militar kontra insurhensia iti pannakapugipog dagiti civil society organizations a mapapati a parupa ti Communist Party of the Philippines.

Ngamin uray kasano ti panangipetpetteng ti gobierno ken ti militar nga awan ti pannuportada kadagiti extra-judicial killings, agtultuloy latta dagitoy idinto nga awan met ti matiltiliw ken madusdusa a nagisayangkat.

Nabayagen a narpuog ti komunismo iti nadumaduma a paset ti lubong, nangruna iti Soviet Union, no apay nga agtultuloy latta ti puersa ti New People’s Army.

Adu dagiti nangruna a rason no apay a di mapugipog insurhensia, kas iti kinapanglaw, kurapsion ken panagkunniber.

Dagitoy ketdi ti ipaayan iti imatang ti turay.#