Footer

Pamilia a masuspetsa a miembro ti Kuratong Baleleng, natiliw

CAMP BGEN OSCAR M FLORENDO – Naipakita ti kinapateg ti intelligence network ti Police Regional Office 1 kalpasan a ma-arestarda ti masuspetsa a founder ken dua a miyembro ti Parojinog/Kuratong Baleleng Group idi malem ti Abril 16, 2018 iti maysa a checkpoint sadiay Diversion Road, Bangcusay, siudad ti San Fernando, La Union.

Innaganan ni Police Chief Superintendent Romulo E. Sapitula, Regional Director ti PRO1, dagiti suspects a da Manuelito Estomata Francisco, 57, awanan trabaho; Rizalina Ozamiz Francisco, 54, asawa ni Manuelito ken City Councilor ti Ozamiz City, Misamis Occidental ken anakda a ni June Ozamiz Francisco alias Omboy, 31, retirado a barangay chairman ti San Roque, Ozamiz City.

Segun kenni PCSupt. Sapitula, naarestar dagiti tallo kalpasan a napasardeng ti naglugananda a Toyota Innova nga adda conduction sticker VD4899 iti nasao a checkpoint a nairanta tapno matiliwda. Karaman kadagiti nangarestar ti nagtipon a puwersa dagiti operatiba ti San Fernando City Police, San Juan Police, Regional Mobile Force Battalion 1 (RMFB1), Regional Intelligence Division ti Police Regional Office 1 (RID-PRO1), Misamis Occidental Police Provincial Office (MisOccPPO), Regional Intelligence Unit 1(RIU1), Criminal Investigation and Detection Group-La Union (CIDGLU) ken La Union Police Intelligence Branch (LUPIB).

Naarestar ti pamilya Francisco babaen ti Warrant of Arrest nga inyetnag ni Honorable Judge Edmundo P. Pintac iti Regional Trial Court 10th Judicial Region, Branch 15, Ozamiz City idi Pebrero 6, 2018 para iti krimen a Violation of Republic Act 9516, babaen iti Criminal Case Number RTC-8516. Awan ti nairekomenda a piansa para iti tallo.

Innayun ni PCSupt. Sapitula a segun iti inbestigasion dagiti operatibada, ni Manuelito ti maatap a co-founder ti Parojinog/Kuratong Baleleng Group, maysa a grupo a mapapati a karaman kadagiti ilegal nga aktibidad kas iti panagtakaw, extortion, maiparit a droga, kdpy. Pimmanaw ti pamilya iti lugarda idi natay ni Mayor Reynaldo Parojinog. Agpa-Manila manipud iti probinsya ti Ilocos dagiti tallo idi matiliwda.

Dinayaw ni Sapitula dagiti polisna iti naindaklan a gapuananda ken binagaanna pay dagitoy nga agbalin a “more vigilant and proactive in intelligence gathering in order to curb more criminals who might be hiding in our region.  Let us enhance our intelligence sharing as it provides a starting point for our criminal investigations and subsequent prosecutions.”

Naipan ti pamilia Francisco iti San Fernando City Police Station para iti temporario a pannakaibaludda sakbay a maipaimada iti umno a korte. (PIO, Region I)