sinursuran-banner-sqSinursuranNi Jobert M. Pacnis

Pamilia: Bukel ti Mustasa a Rumbeng nga Agrangpaya

Sinursuran: Kolum ni Jobert M. Pacnis
(Maikadua a paset)

ITI agdama, bumasbassiten ti impluensia ti ama iti pamilia gapu iti pannakayadayo daytoy tapno agsapul iti pangbiagna kadagiti bungada nga agassawa. Kasta met ti ina nga addaanen iti pumada a karbengan ken kalintegan iti uneg ti pagtaengan.

Pagangayanna, manmanon a mapasamak ti panagtutungtong a mangpairut koma pay iti kinnayammet iti uneg ti pamilia. Ania ngarud ita ti rumbeng a maaramid tapno di mayadayo dagiti annak ket saanda a maisagmak ken agbalinda a produktibo a kameng ti komunidad?

Kasapulan unay dagiti annak ti dungngo. Pammateg. Siguraduen ngarud koma dagiti agassawa nga adda panawenda kadagitoy. No mabaybay-anda, di bumurong nga agrebelde ti pampanunotda.

Ikagumaan koma dagiti nagannak ti kaadda ti panawenda a mangammo iti karirikna dagiti annak. Ania dagiti parikut dagitoy? Dagiti kasapulanda? Dagiti arapaapda?

Masapul met a mangilatang dagiti agassawa kadagiti annuroten iti pagtaengan a rumbeng a masurot ti tunggal kameng ti pamilia. Saan a makalisi ditoy dagiti nagannak. Kas koma kadagiti sumaganad: maiparit ti agsigarilio, agsugal, uminom iti nasanger, makibarkada; dumawat iti permiso iti maseknan no adda usaren a ramit daytoy; dumawat iti pammalubos kadagiti nagannak no adda papanan; panagpili iti gagayyem; pannakaiwaras ti obligasion tapno naannayas ti pannakaipatungpalda. Ipagutigot laeng kadagiti annak ti kinapateg ti ayat iti tunggal annongen a trabaho tapno agbalin daytoy a nabunga.

Kadagitoy a panawen, adu ti mangagaw iti atension dagiti annak. Adda dita ti aglawlaw ken barkada. Dagiti partuat ti teknolohia ken siensia: selpon, kompiuter, telebision, videoke kdpy. Kasta met ti makailuod nga agas, ay-ayam a kas koma iti biliar, innipis ken fruit game.

Iti tallo a pagadalan ti haiskul ditoy ilimi, adun nga ubbing ti di nakapagtuloy gapu kadagiti agkaraiwara a pagay-ayaman iti biliar kasta metten kadagiti computer center. Ti ammo dagiti nagannakda, sumsumrekda iti pagadalan. Antagayam, agdiretsoda kadagiti makaidagel nga aramid.

Nobenta porsiento (90%) iti agassawa idinto a sangapulo laeng iti aglawlaw ken dagiti mangisursuro ti responsibilidad para iti pannakamuli ti anak. Masapul ngarud ti naynay a pannarabay dagiti nagannak kadagiti annakda. Siputanda ti ar-aramiden dagitoy. No kasapulan a sarungkaranda dagitoy iti pagadalan, kasta koma ti maaramid.

Kadagiti naagapad, ipamatmatna laeng a narikut ti agpamilia. Kas kuna ti maysa nga ina: “Ti panagpamilia ket maysa a panagserbi, panagsakripisio, panagtuok, panagsangit, panagkatawa ken panagayat.”

No nalablabes ngem maysa ti anak, ikagumaan koma dagiti agassawa ti panamagbalin iti inaunaan a modelo. Dakkelto a katulonganda daytoy iti pannakaiwardas kadagiti dadduma nga anak. Kastoy ti kapadasan ni Apo Felix Bautista, editor ti Veritas. Nagbalin amin a produktibo dagiti 11 nga annakda. Kuna pay ni Apo Bautista:

”Liklikan koma ti kaadda iti paborito nga anak.”

Saludsoden dagiti dadduma: “Kaano a rugian a disiplinaan dagiti anak?”

Kuna dagiti agsuksukisok, sikog pay laeng ti ubing, rebbengnan a kapatangen dagiti nagannak. Dakkel kan’ a banag daytoy iti panagbalinna a natulnog iti masakbayan. Iraip a kanayon ti Biblia no kasta a sursuruan dagiti ubbing.

Obligasion pay dagiti agassawa nga ipaay ti kinasalun-at kadagiti annakda. Ta kasano nga agbalin a nabunga dagitoy no aglalamidamet? Isuro ti umno a taraon ti bagi kadakuada. Ania dagiti rumbeng a liklikan? Ania dagiti makapasalun-at? Yadal met ti benepisio ti panagwatwat, ti kaadda ti positibo a sirmata. Ken panagbuteng iti Dios.
(Adda tuloyna)