Pamilia dagiti biktima ti pammaltog, saandan nga interesado iti kaso

SAN JUAN, Ilocos Sur – Saanen nga interesado dagiti pamilia ti biktima a mangituloy pay iti kaso ti pammaltog a nakatayan daytoy.

Nagpirma iti apidabit dagiti kakabsat ni Carlito Alejandro y Riambon, 29, baro, ken residente iti Barangay Nagsupotan ditoy nga ili, a saandan nga interesado pay a mangituloy iti kaso.

Nagapela pay dagitoy nga isardengen dagiti polis ti panagimbestigada mainaig iti nasao a kaso.

Maipalagip a napaltogan iti maysa a natayan ni Alejandro idi rabii ti Pebrero 17 sadiay Barangay Lira, San Juan a nakairamanan met a nasugatan ni Bobby Francisco Corpuz, Jr. y Viloria, 49, ken residente iti Barangay Resurreccion.

Nupay kasta, naammuan nga itultuloy latta ti San Juan police station ti agisayangkat iti in-depth investigation tapno maammuan ti kinaasino dagiti suspek iti pammapatay.#