Pammagbaga, nagtungpal iti pammaltog

NARVACAN, Ilocos Sur – Binagbagaan dagiti biktima ti kabsatda ngem dakes ti nagawatan daytoy ket pinaltoganna ida.

Naitaray iti Central Ilocos Sur District Hospital ditoy nga ili da Teodora Banez, 73, baak, retirado nga empleado ti Land Transportation Office, ngem naideklara a natayen ni Gaspar Banez y Mariano, 76, naasawaan, maysa a balikbayan, ken agpada a residente iti Barangay Sarmingan, ditoy nga ili.

Nainaganan ti pimmaltog kadakuada a ni Benjamin Banez y Mariano, 65, inaudi a kabsat dagiti biktima ken kalugaranda met laeng.

Segun iti report, bayat ti kaadda ti suspek iti balay ni Teodora, binagbagaan dagiti kakabsatna ngem mapapati a saan a nasayaat ti panagsaadna iti suspek ket pinaltoganna dagiti kakabsatna.

Nakasarak dagiti nagresponde a polis iti maysa a kapsula manipud iti cal .22 iti uneg ti balay ni Teodora.#