Pammagsol, nagramut iti riri ti aguliteg

BANAYOYO, Ilocos Sur – Naragsakda a naggiinom iti kataltalonan ngem idi naggawiddan iti dayta a rabii , naparnuay ti riri dagiti aguliteg a puon ti nangbagsolan ti suspek iti ulitegna.

Nabigbig dagiti biktima a da Roger Garnace y Gandalera, 48, naasawaan, mannalon ken ni Onofre Garnace y Gandalera, 54, naasawaan, mannalon, idinto a nainaganan ti suspek a ni Romel Garnace Macadangdang, 30, baro, agpapadada amin a residente iti Barangay Lintic ditoy nga ili.

Napasamak ti pammagsol idi agarup 10:30 ti rabii ti Nobiembre 24 iti sanguanan ti balay ti maysa a Ruben Garnace.

Kas maibatay iti report, naganawa ni Onofre idi nagriri da Roger ken ti anakna a ni Romel, ngem aksidente a nawaradiwadan ni Roger nga adda iggemna a bolo a nakasugatan ti makannawan a takiag ti lakay.

Naggawid ni Romel sa nangala iti imuko ket binagsolna ti makannawan a barukong ti ulitegna.

Intaray dagiti nagresponde a polis dagiti biktima iti Candon General Hospital para iti pannakaagas ti su-gatda.

Saan a narekobre ti imuko a naaramat iti pammagsol.#