Footer

Pammaltog iti Zone 1, Bantay, addan suspetsa ti polis

BANTAY, Ilocos Sur – Addan suspek dagiti inbestigador mainaig iti pammaltog a napasamak iti asideg ti pasdek ti Department of Public Works and Highways a sakup ti Zone 1 ditoy nga ili idi apaglabes ti tengnga ti rabii idi Oktubre 19.

Kinuna ni PSI Andrew Rabang, OIC ditoy, nailasin dagiti kakadua ti biktima ti maysa kadagiti suspek ket napanda tinunton daytoy iti pagtaenganda ngem awan a nadanonda.

Nupay kasta, saan nga impalgak ni Rabang ti kinasiasino ti suspek tapno saan a maunaan ti inbestigasionda.

Segun ken ni Rabang, nagreport iti police station ni Erwin Ribuyaco y Laureta, 34, naasawaan, ken residente iti Barangay Poblacion, San Vicente, Ilocos Sur nga adda napaltogan iti nadakamat a lugar idi agarup 12:30 ti tengnga ti rabii ti Oktubre 19.

Dagus a nagresponde dagiti polis ngem naitarayen ti biktima iti Metro Vigan Cooperative Hospital.

Iti panagimbestiga dagiti polis, agpaabagatan a direksion ti motorsiklo a nakisakayan ti biktima a nainaganan Bryan Bungos y Reyes, 23, naasawaan, ken residente iti Barangay Poblacion, San Vicente ket iti asideg ti pasdek ti DPWH, limmabas ti  motorsiklo a Kawasaki Bajaj a nagkalubbonan ti dua a lalaki ken ti Yamaha Mio a minaneho ti maysa a lalaki a nakisakayan dagiti babbai ket pinaputokan iti namitlo ti back rider ti Kawasaki Bajaj ti biktima a nagsagrapan daytoy iti sugat iti ulo ken nakaikrasan ti motorsikloda.

Naglibas dagiti suspek kalpasan ti pammaltog.

Segun ken ni Rabang, immuna a nagginom ti grupo da Bungos iti KTV bar a masarakan iti New Lyric Cinema iti Barangay III, Vigan City ket adda mapapati a dida panagkikinnaawatan iti sabali a grupo nga aggiinom.

Kalpasan ti panaginom da Bungos iti bar,  napanda iti pagmikian iti Zone VI, Bantay, ngem saanda a nagtuloy gapu iti kaadu ti tao.

Ngem maysa a kadua ni Bungos ti nakadakamat iti polis a nailasinna ti maysa iti bunggoy a nakasubangda iti KTV Bar.

Nagsubli ti grupo ni Bungos iti Vigan tapno birokenda dagiti dadduma pay a kakaduada ngem mapapati a simmurot ti bunggoy a nakaririda ket pinaltogan ti suspek ti biktima.

Kabayatanna, naiyalis ni Bungos iti San Fernando City tapno maoperar ti sugatna. Segun iti polis, naimula ti bala iti ulo ti biktima.#