Pammaltog, nagramut iti kurang a pulotan

CANDON CITY – Nagramut daytoy pammaltog gapu ta nagkurang ti pulotan nga indasar ti nagpakasangay kadagiti pinainomna a kalugaranna.

Pinaltogan ni Rosario Tao y Flores, 32, naasawaan, ken residente iti Sitio Nagbalsaan, Barangay Balingaoan, Candon City ni Raymund Gallandez y Galoso, 23, baro, kalugaranna gapu iti panangkariar daytoy ken dagiti kakaduana gapu iti panagkurang ti pulotanda bayat ti panaginomda.

Naammuan iti inbestigasion a kalpasan ti panangselebrar ni Tao iti kasangay ti anakna a babai, naisaruno ti drinking session para kadagiti kabaddungalanna.

Simmangpet ti biktima ken dua a di nainaganan a kaduana ket naggiinomda iti sabali a lamisaan.

Mapapati a naibusan iti pulotan dagiti tallo ket dinagdagda a mangted ni Tao iti pulotan ngem insungbat daytoy a naibbusen a puon ti nakarurodan dagiti tallo ket kinastigar ken kinabilda ti suspek.

Nagtaray ti suspek a simrek iti balayna ngem kinalampag dagiti tallo ti ridaw ken tawa babaen ti tugaw ken bato. Idi sumrek koman ni Gallandez, pinaltogan ti suspek a nakatamaan ti makannigid a saka daytoy.

Naitaray ti biktima iti Candon City Hospital idinto a boluntario a simmuko iti polis ti suspek.#