7 illegal a nagpukan iti kayo, natiliw

TAGUDIN, Ilocos Sur – Pito a lallaki ti naaresto kalpasan a nasukalanda nga illegal a nagpukan iti kayo iti kabakiran ti Barangay Cabugbugan ditoy nga ili idi malem ti Enero 19.

Nagtipon ti polis ditoy ken dagiti personnel ti Department of Environment and Natural Resources a nangtiliw kada Benedicto Ignacio y De Guzman, 24, baro; Nario Letran y Garcia, 34, naasawaan; Benedict Lopez y Garcia, 17, baro; Efren Garcia y Garcia, 22, baro; Jessie Garcia y Garcia, 32, naasawaan; ken Freddie Garcia y Fajardo, 26; agpapada a residente ti Brgy. Cabugbugan, Tagudin, Ilocos Sur.

Dagus a nakikoordinar dagiti polis ditoy nga ili iti DENR kalpasan a nakaawatda babaen ti Tagudin 911 iti report manipud iti maysa a maseknan nga umili nga adda nakitana a grupo dagiti lallaki nga agpukpukan iti narra iti kabambantayan a paset ti nadakamat a lugar.

Maysa nga intelligence operative ti naibaon iti nadakamat a lugar tapno kumpirmaranna ti report ket idi positibo daytoy, naggunayen dagiti polis ken dagiti taga-DENR a nangtiliw kadagiti suspek.#