Pammaltog naisayangkat iti San Juan, Magsingal

SAN JUAN, Ilocos Sur – Dua manen a pammaltog a nakagandatan ti biag ti dua a lalaki ti naisayangkat iti nagsaruno nga aldaw iti Magsingal ken ditoy nga ili.

Napaltogan ni Rizalino Varilla y Vibangco, 34, naasawaan, mannalon ken residente iti Barangay Immayos Norte ditoy nga ili, idi rabii ti Hunio 12, idinto nga idi rabii ti Hunio 13  a nagandat ti biag ni Juanito Vagay y Pascua, 50, naasawaan, natibo iti Barangay Pandayan, San Juan, Ilocos Sur ngem agdama a residente iti Barangay Maratudo, Magsingal.

Iti report manipud iti polis ti San Juan, adda da Varilla ken ti live-in partnerna a nainaganan Jerilyn Ullero y Giron, 19, iti uneg ti balayna ngem rimmuar ti biktima gapu iti panagtaultaul ti asoda idi agarup alas 8:00 ti rabii.

Bayat ti panangsilaw ti biktima ti aglawlaw babaen ti flashlight, pinaputokan dagiti di nabigbig nga armado a tattao a nagsagrapanna kadagiti sugat iti nadumaduma a paset ti bagina.

Naitaray ti biktima iti Metro Vigan Cooperative Hospital, Bantay, Ilocos Sur.

Nakarekobre dagiti nagresponde a polis iti crime scene iti pito a kapsula ken maysa a basyo a mapapati a nagtaud iti cal .45 ken gauge 12 shotgun.

Di pay ammo ti motibo ti pammaltog wenno ti kinasiasino dagiti nanggandat a manggudas ken ni Varilla.

Kabayatanna, dua a tao a nagkalugan iti motorsiklo ti maitudtudo a nanggandat iti biag ni Vagay bayat ti panagdaliasat ti motorsiklo a minanehona iti national highway a sakup ti Barangay Bungro, Magsingal idi agarup alas 8:15 ti rabii ti Hunio 13.

Mapapati a kinamat dagiti suspek ti motorsiklo ni Vagay ket idi makaasidegdan, pinalikudanda a pinalpaltogan ti biktima a nakapuntaan ti makannigid a patongna.

Naglibas dagiti suspek a nagturong iti amianan a direksion idinto a naitaray ti biktima iti Magsingal District Hospital sa naiyalis iti Metro Vigan Cooperative Hospital para ti pannakataming dagiti sugatna.

Nakarekobre dagiti polis iti pito a kapsula a nagtaud iti cal .45 iti nakapasamakan ti pammaltog.

Iti pannakaisurat daytoy, saan pay nga ammo ti motibo ti pannakagandat ti biag ni Vagay.#