Pammilin ni Chavit kadagiti meat vendors: 100/kilo paggatangda iti baboy iti uneg ti 15 aldaw

VIGAN CITY – Nangrugi itay Enero 17, P100 kada kilo ti paggatangan dagiti meat vendors kadagiti baboy a taraken dagiti hog raisers ditoy probinsia, kas panagtungpal iti pammilin ni Gov. Luis “Chavit” Singson kas aksionna iti word war iti nagbaetan dagiti hog raisers ken meat vendors mainaig iti presio dagiti mailako a baboy iti probinsia.

“Gapu ta saan nga agsabat ti kayatda, kinapatangko dagiti aglaklako a padasenda a gatangen dagiti baboy iti presio a kayat dagiti agtartaraken iti uneg ti sangapulo ket lima nga aldaw tapno makita no agpukaw dagitoy wenno agganarda,” kinuna ti gobernador iti pannakiuman kenkuana ti media itay nabiit.

Agpatingga ti direktiba inton Enero 31 ket agsasangonto dagiti dua a grupo para iti sabali manen a panagpapatang.

“Masapul a mabalanse ti amin a banag tapno agpada nga agbiag dagiti agtartaraken ken aglaklako iti karne ti baboy. No awanen ti mayat nga agtaraken wenno aglako iti baboy, dagitinton tagasabali a probinsia ti agidiktar iti bukodda a presio. Kakaasi dagiti consumers,” innayon pay ni Singson.

Sakbay daytoy, dimmatag dagiti agtartaraken ken ni Singson tapno ipakaammoda a dakkelen ti lugida gapu iti pannakaiserrek dagiti oversized a baboy manipud kadagiti kabangibang a probinsia nga amang a nalaklaka no maikumpara iti presio ti baboy ditoy probinsia.

Segun kadagiti hog raisers, saan a maibilang a prime meat (first class) ti baboy nga agdagsen iti nasursurok ngem 90 a kilo.

Nangitunda daytoy iti panangipaulog ni Singson iti maysa nga executive order a mangipawil iti pannakaiserrek iti probinsia dagiti baboy nga agdagsen iti 100 kilo agpangato.

Ngem dimmatag dagiti meat vendors ken agparparti ken ni Singson ket kinunada a kasapulanda ti gumatang kadagiti dadakkel a baboy ta dagitoy ti aramidenda a longganisa ken bagnet idinto nga innayonda a saan a kabaelan nga ited dagiti agtartaraken ti kasapulanda a bilang dagiti maparti a baboy.

Kinuna ti Cesar Lazo, presidente dagiti meat vendors iti Vigan City, nga aganay 70 a baboy ti maiserrek iti inaldaw iti Vigan slaughter house tapno maparti.

Ngem impatalged ni Juliet Seguban, maysa a piggery owner, a kabaelanda a suplayan dagiti meat vendors agsipud ta  adda 250 a takongna ken diretso ti panaganakda kadagiti mataraken a para fattening.

Kabayatanna, impakaammo ni Provincial Veterinarian Ernesto Mendoza a manipud idi naiparuar ti pammilin ni Singson a pannakaiparit dagiti oversized a baboy a maiserrek ditoy probinsia, awanen ti naiserrek pay iti quarantine iti Barangay Bio, Tagudin.

“Awanen ti naiserrek a baboy nga agdagsen iti nasurok a 100 a kilos agsipud ta nabilin dagiti agbambantay sadiay nga ingetanda ti agmonitor kadagiti maiserrek nga oversized a baboy iti probinsia,” kinuna ni Mendoza.

Segun iti rekord dagiti agbambantay iti quarantine, idi Disiembre itay napan a tawen, nasurok a 50% dagiti naibiahe a baboy ditoy probinsia ti aggapu iti Bulacan.#