Panag-quarry iti Tagudin, salakniban ti mayor

TAGUDIN, Ilocos Sur – Saan nga ipalubos ti municipal government ditoy ti pannaka-recall ti memorandum of agreement mainaig iti panagquarry iti karayan Amburayan iti daytoy nga ili  ket  itedda lattan iti probinsia ti pannakaimaton iti quarry.

Kinuna ni Mayor Roque Verzosa, Jr., a salaknibanna ti nasao a katulagan a pinirmaanna kas ama ti ili  ken dagiti nadumaduma nga ahensia ti gobierno ken ni sigud a gobernador Luis Chavit Singson agsipud ta daytoy ti pamastrekan ti ilina.

Napirmaan ti MOA babaen kenkuana a kas ama ti ili, ni Singson, ti director ti EMB, DPWH, DENR ken ti MGB.

“Idi nagtakemak, nakitak a no awanton ti sumangpet a bingay ti tunggal ili manipud iti  R.A.7171, marigatanton ti ili a tumakder, isu a nagpanunotak iti pamastrekan ti ili… maysa daytoy quarry operations,” kinuna ni Verzosa.

Inlawlawagna a ti pannakapapirma iti MOA ti maysa kadagiti kangrunaan nga insayangkatna ket nagturong pay iti Mines and Geographical Bureau ken EMB sana impaadal no sadino ti napintas a pag-quarryan iti nasao a karayan.

Kinuna a babaen daytoy a wagas, maliklikan ti panagkali iti sadino la ditan a lugar iti karayan. Pakairamanan a sakupen ti quarry ti barangay Bucao East, Bucao West, Bio, Salvacion, Pula ken dadduma pay.

Dinakamat pay ti mayor a ti ili ti mangimaton iti quarry tapno maproteksionan dagiti umili agsipud ta  responsibilidad ida ti ili.

Kinuna ni Verzosa a sagudayen ti nasao a MOA a maited ti isu met laeng ti remittance:  30% iti probinsia, 30% ti mapan iti munisipio, ken 40 % iti barangay.

Kinuna ni Verzosa a maragsakan pay ti EMB ta isudan ti mangimaton ta maipakat ti nainget ken responsible a panag-quarry. Gapu iti daytoy, agdiretson ti danum iti baybay ket naliklikan ti layus.

“Napintas met ti remittancemi ta immabot  ti total a koleksionmi manipud 2005 agingga iti August 2007 iti P2,084,645,” kinuna ni Verzosa idinto nga innayonna a nakabingay ti Barangay  Bio iti P542,918.

Kinuna ti mayor a dida umannugot a ti probinsia ti mangimaton iti panag-quarry iti nasao a karayan ta daytoy ti paggapuan ti pamastrekan ti ili.

“Ti quarrymi ditoy ti ibilangmi nga R.A.717,” kinuna ni Verzosa.#