Banner News: Panagannad iti peke a kuarta ita a panawen ti Paskua, ballaag ti BSP | Tawid News Magazine - Weekly Ilocos News 📰

Panagannad iti peke a kuarta ita a panawen ti Paskua, ballaag ti BSP

VIGAN CITY — Panagannad dagiti umili kadagiti peke a kuarta wenno peso bills ta adun dagiti kaso ti pannakaisukat dagiti counterfeit peso bill kabayatan ti yaasideg ti panawen ti Paskua.

Dayta ti inyetnag a ballaag ni Ms. Evelyn Tanagon, Branch officer ti Bangko Sentral ng Pilipinas, Batac, Ilocos Norte, kabayatan ti Dap-ayan Media Forum nga inangay ti Philippine Information Agency iti Provincial Capitol idi Oktobre 24, 2019.

Impakaammo ni Ms. Tanagon a kas kadagiti naglabas a tawen, umadu ti kaso ti panagwaras dagiti peke a P1,000 ken P500 peso bills no umasideg ti Paskua gapu ta adu ti paggastosan dagiti umili gapu kadagiti pagkasapulanda iti Holiday Season.

Indariragna a nasken ti panagannad kadagiti awaten ken igatang wenno isupli a peso bills ta amangan no dagitoy ket peke wenno counterfeit ket dagitoy ket awanan iti monetary value, ken mabalin pay a makasuan no gandaten nga isupli wenno igatang.

Inlawlawagna dagiti kadawyan a paglasinan tapno mabigbig dagiti counterfeit bills kas ti panangapiras kadagiti security thread a saan a kas kadagiti gagangay a papel.

Insurona pay ti panangmingming wenno panangsirig iti water mark dagiti genuine a papel a kuarta nga awan kadagiti bogus a peso bills. Imbalakadna a no saan a makasigurado, nasaysayaat a saanen nga awaten dagiti mapagduduaan a peso bills tapno malisian ti pannakagundaway.

Nagballaag met kadagiti mannalon ni Mr. Medardo Santiago, Provincial Officer ti Fertilizer and Pesticide Authority iti Ilocos Sur iti panagannadda kadagiti peke nga abono ken pestisidio. Impakaammona a kas kadagiti kangrunaan a produkto a kasapulan dagiti consumers, adda met latta dagiti peke a ganagan, pesticides, herbicides ken dadduma pay a kemikal a kasapulan iti panagtalon, nangruna kadagiti agpaspasiar nga ahente kadagiti nasulinek a barangay.

Indariragna a nasaysayaat a gumatang laengen dagiti mannalon kadagiti sukida a rehistrado nga aglaklako kagiti farm and agricultural supplies tapno saanda a mabiktima a makagatang kadagiti peke a produkto.

Nagpalagip met ni Ms. Rosemarie Jornacion, Provincial Officer ti Department of Environment and Natural Resources, kadagiti umili, mainaig iti agtultuloy a reforestation progam ti DENR iti Ilocos Sur tapno mapagtalinaed ti naberde nga aglawlaw.

Inlawlawagna a nasuspender pay laeng ti pannakapukan dagiti kayo iti igid ti National Highway gapu ti kiddaw ti Provincial Board ken dagiti environmentalists a nangdawat nga umun-una koma pay a naduprak dagiti konkreto ken awan-mamaayna a makatubeng iti kalsada.

Iti naglabas, nagtutulag dagiti pannakabagi ti DENR, Department of Public Works and Highways ken dagiti local government units para ti pannakaipaay ti special cutting permit kadagiti kayo a nakatakder iti nakonkreto nga igid ti national highway a paset ti road widening project ti DPWH.

Adun dagiti napukan a kayo iti igid ti national highway pakairamanan dagiti century trees a sinuppiat dagiti environmentalists iti Ilocos Sur.

Nagpalagip pay ni Ms. Jornacion kadagiti umili ti panagkasapulan ti panagalada iti cutting permit uray kadagiti kayo a mapukan kadagiti pribado a daga nangruna dagiti century trees.

Kiniddawna met kadagiti umili ti panagmulada iti kayo kadagiti public lands ken bukodda a daga kas pannakikaysada iti pannakasaluad ti aglawlaw ken nakaparsuaan. ●