Panagannad iti uram ita a Christmas Season, palagip ti BFP

VIGAN CITY – Karagsakan a panawen iti tawen ti Tiempo ti Paskua, ngem adda dagiti gundaway a gapu iti kinaliway ken panagbaybay-a ken sobra a panagsalimetket ket mabalin nga agtinnag daytoy a panawen iti trahedia no mabiktima iti uram a posible a pakakettelen iti biag ken dumapuan dagiti nagrigrigatan a napateg a sanikua.

Dayta ti ballaag ken pammalagip ti Bureau of Fire Protection iti Ilocos Sur ken iti daytoy a siudad nga idauluan ti Fire Marshal a ni Chief Inspector Nemesio Valenciano Jr.

Kas paset ti kampania ti BFP ita a Panawen ti Paskua ken panangpasangbay iti Baro a tawen para iti panangpatalged iti seguridad dagiti umili ken pannakalapped ti pannakapasamak ti uram, mangisaysayangkat ti ahensia iti Oplan Iwas Sunog babaen ti panagpalagipda kadagiti umili iti panagannadda. Nakaalerto pay dagiti kameng ti BFP agingga iti malpas ti Baro a Tawen tapno nakasaganada nga agresponde no adda tumaud nga uram.

Nagpalagip ti BFP kadagiti umili nga agusarda laeng iti ruar dagiti balay ken pasdek kadagiti Christmas lights ken dekorasion a silaw a nairanta a “for outdoor use” tapno maliklikan ti “electric shock” no mabasa gapu iti tudo wenno gapu iti dakes a panawen.

Imbalakad ti BFP ti panang-inspeksion a nasayaat kadagiti Christmas lights, electric decorations ken extension cords iti nakulanitan a paset ti waya ti koriente ken dadael a plug ken bombilia. Imballaagda pay a liklikan ti panagisaksak iti adu a plug iti maymaysa nga outlet wenno octupos connection tapno malisian ti overloading ti koriente.

Nagpalagip pay ti BFP kadagiti umili a saanda nga ipan dagiti appliance cords wenno extension cords iti uneg ti carpet. Nagballaagda pay a saanda a panawan a nakasindi dagiti Christmas lights ken pagpatnagen nga agsilsilaw tapno malapdan ti overheating.

Indarirag pay ti BFP kadagiti umili a saanda nga ipan dagiti Christmas tree ken dekorasion iti asideg dagiti kurtina ken nalaka a sumged a banag. Nagballaagda pay saanda a panawan dagiti nagangtan a kandela wenno sukatan dagiti tradisional a kandela kadagiti electric/battery-operated candle, ken saanda a lipatan nga iddepen no panawanda dagiti balayda tapno malisian ti overheating.

Nagpakdaar pay ti BFP a no mabalin ket liklikan dagiti umili ti agusar kadagiti firecrackers, ken agaramatda iti alternatibo a wagas iti panangpasangbay iti Baro a Tawen. Imbalakadda pay ti panangirikep wenno panangsiput kadagiti tawa dagiti balay no sumangbayen ti Baro a Tawen ta amangan no adda dagiti aksidente a sumrek a paputok wenno firecrackes.

Nagpalagip pay ti BFP a gumatang ken agusar laeng koma dagiti umili kadagiti Christmas lights ken electric materials para kadagiti liniada kadagiti genuine a produkto nga addaan iti selio a Product Standard (PS) para kadagiti naaramid iti Pilipinas ken International Commodity Clearance (ICC) a naggapu manipud iti ballasiw-taaw. 

Impalagip pay ti BFP a nasayaat unay nga iti tunggal balay wenno pagtaengan ket adda latta koma fire extinguisher wenno nakasagana a pagbuyat a danum inkaso nga adda tumaud nga uram. Indariragda a nasayaat nga ken adda naka-phonebook a numero ti telepono dagiti lokal a fire stations tapno nadaras ti itatawagda no adda mapasamak nga uram. ●