Panagannad iti uram, naidagadag

CAOAYAN, Ilocos Sur – Indagadag ti opisial ti Bureau of Fire Protection ditoy nga ili ti panagannad dagiti umili tapno malapdan ti uram bayat ti pannakapaliiw ti Semana Santa.

Pinalagipan ni BFP Marshall Edgar Quilala dagiti kalugaranna iti panagannadda iti panagusarda iti kandela a nakaugalian a maitugkel iti groto wenno iti altar iti pannakapaliiw ti Semana Santa.

Inyunay-unay ni Quilala a no agitugkel dagiti bumalay iti kandela iti groto wenno iti altar, kitaenda ta saanda a maiyasideg kadagiti nalaka a sumgiab tapno malapdan ti uram.

Segun iti opisial, sakupen ti Semana Santa ti kalgaw ket nalaka a sumgiab dagiti bambanag no maidekketda iti apuy gapu iti kabara ti panawen.#