Salaysay: Panagannad kadagiti trahedia iti tiempo ti Paskua | Tawid News Magazine - Weekly Ilocos News đŸ“°

Panagannad kadagiti trahedia iti tiempo ti Paskua

TIEMPO ti Paskua ti karagsakan a paset ti panagrambak dagiti Kristiano iti intero a lubong kas panangilagip ti pannakaipasngay ni Apo Jesus a Mesias. Ditoy Pilipinas, iti laksid dagiti adu ken nalabes a panagragragsak iti daytoy a panawen, adda dagiti mapaspasamak a trahedia a mangipaay iti nakaro a ladingit kadagiti biktima ken dagiti ipatpategda iti biag.

Kadagiti naglabas a tawen, maibilang a kaaduan a trahedia iti tiempo ti Paskua ket dagiti nabikbiktima ti paputok ken naiwawa a bala ti paltog. Adun dagiti natay ken nadangran gapu kadagitoy nga insidente, ken nauraman iti pagtaengan iti laksid iti tinawen a kampania ti Department of Health, Philippine National Police, ken Bureau of Fire Protection iti panagusar kadagiti napigsa a paputok ken paltog no sumangbay ti Tiempo ti Paskua ken sarabuen ti Baro a Tawen.

No man pay bumasbassiten dagiti maak-aksidente kadagiti paputok ken nayaw-awan a bala itay 2017 no maikompara kadagiti naglabas a tawen, saan nga agbaybay-a ti DOH, PNP ken BFP a mapababa pay daytoy ken agbalin a zero casualty.

Iti laksid a pinirmaanen ni Presidente Rodrigo Duterte ti Executive Order No. 28 idi Hunio 20, 2017 napaingeten ti pagannurotan iti panagaramat iti pagilian kadagiti firecrackers ken pyrotechnic, babaen ti panangipawil kadagiti napigsa ken makadangran a paputok, ken mangimanmandar kadagiti local government unit ti pannakaisayangkat dagiti community fireworks display tapno maliklikan dagiti adu nga aksidente ken trahedia. Ngem idi Disiembre 2017 ket adu pay laeng dagiti nadangran gapu iti pannakaaksidenteda kadagiti nagduduma a paputok ta saan a naan-anay a naipatungpal ti pagannurotan babaen kadagiti maseknan nga ahensia ken LGU.

Sagudayen ti Executive Order No. 28, maipawilen ti panaglako ken panagaramat kadagiti adu ti pulborana ken napigsa a paputok kas ti bawang, super lolo, thunder, piccolo, watusi ken dadduma pay a napigsa ken makasabidong a paputok ken pyrotechnic.

Maimanmandar pay kadagiti LGU ti a mangdesignarda ti community fireworks display kadagiti saan a residential area babaen ti panangbayabay dagiti eksperto ken kameng ti PNP tapno malisian dagiti aksidente.

Nadutokan a mangipatungpal ti pagannurotan ti PNP, DOH, BFP, Department of Education, Department of Environment and Natural Resources ken LGU a mangisayangkat ti information campaign iti peggad ti panagaramat kadagiti fireworks. Ngem addan iti maikadua a Disiembre kalpasan a naipaulog ti pagannurotan, ngem nakirang ti panagtignay dagiti amin a namandar nga ahensia.

Nagbalinen a paset ti tradision ken kultura dagiti Pilipino iti agaramat kadagiti nagduduma a paputok no tiempo ti Paskua ken sarabuen ti Baro a Tawen kas wagas tapno bugawen dagiti dakes nga espiritu nga adda iti aglawlaw. Maysa daytoy a tradision a natawid kadagiti Tsino a nakaimbento ti pulbora. Ngem daytoy nga aramid ken wagas a panagbugaw kadagiti dakes nga espiritu ket pagano a pammati. Kas Kristiano, ti kabilegan a panangpapanaw kadagiti dakes nga espiritu ket babaen ti kararag ken bileg ni Apo Dios, saan ketdi a ti panagaramat kadagiti paputok ken paltog a no dadduma ket agbunga iti aksidente ken trahedia, nga imbes a ragsak ti ipaayna kabayatan ti panagrambak iti panawen ti Paskua ken panangsarabo iti Baro a Tawen ket liday ti ibungana.

Itay naglabas a tawen, adda latta dagiti napapatay nga inosente a biktima a napuntaan kadagiti naiwawa a bala ti paltog a pinaputok dagiti irresponsible gun owners. Nagadu dagiti naisaysayangkat nga imbestigasion ti PNP ken adda pay dagiti dadduma a kaso a naipresentar a suspek. Ngem kabayatan ti panaglabas ti panawen, in-inut a bimmaaw dagiti imbestigasion, ken awanen ti binanag dagiti kaso, agingga a naipempend gapu iti kinaawan dagiti agtestigo. Nagangayanna, saan a nagun-od ti hustisia dagiti biktima.

Kalaksidan kadagiti panaglako ken panagusar kadagiti dadakkel a firecrackers a siputan ken bantayan ti PNP, maipamaysa koma pay a siputanda dagiti agpaputok iti paltog nangruna iti panawen ti Paskua ken panangsarabo ti Baro a Tawen ta adu latta dagiti nasukir a mangiputok kadagiti paltogda a gapu ti aksidente nangruna kadagiti lugar nga ayan dagiti adu a balay wenno residential area.

Kadagiti nagkakauna a tawen, kangrunaan a mabanbantayan ket dagiti asideg dagiti kampo dagiti soldado ken polis ta mapapati nga ayan dagiti adu a maak-aksidente. No tunggal agbakasion dagiti military ken polis iti panawen ti Paskua agingga iti Baro a Tawen, maselioan wenno mapigketan iti napirmaan a masking tape ti barrel dagiti naka-issue a paltog kadagiti polis ken soldado. Ngem itay 2017, pinasardeng ti sigud a PNP Chief ti pannakselio dagiti issued firearms dagiti polis ta talkenna kano ida a saanda nga irresponsible a paputoken dagiti paltogda. Ngem no ti impakita a disiplina dagiti pasurotna, natungpalda ngata ti mandarna?

Ita a tiempo ti Paskua ken panangpasangbay ti Baro a Tawen idardarirag ti PNP, DOH ken BFP ti panagannad kadagiti aksidente iti panagaramat ti paputok, paltog ken panagannad iti uram a kaaduanna ket adu dagiti kastoy a trahedia a mapaspasamak itoy a panawen. #