Banner News: Panagannad iti layus ken bagyo, palagip ti Ilocos Sur PDRRMO | Tawid News Magazine - Weekly Ilocos News 📰

Panagannad iti layus ken bagyo, palagip ti Ilocos Sur PDRRMO

VIGAN CITY – Dimtengen ti matutudo a tiempo ket mapasungadanen dagiti layus ken bagyo, isu a nasken ti panagsagana ken panagannad dagiti umili iti idadateng dagiti nagduduma a didigra.

Dayta ti pammalagip ni Ilocos Sur Provincial Disaster Risk Reduction Management Officer (PDRRMO) Engineer Michael Chan kadagiti umili kabayatan iti naangay a Dap-ayan Media Forum sadiay Philippine Information Agency Office iti Provincial Capitol idi malem ti Hulio 4, 2019.

Nagballaag ti PDRRMO a saan laengen a “climate change” ti mapaspasamak iti lubong, ngem “climate crisis” ta nakarangranggasen dagiti sumangsangbay a didigra ket nasken a kanayon a nakasagana dagti umili no adda dagiti dumteng a kalamidad kas dagiti bagyo ken layus. Impalagipna a nasken a dagiti umili ket agridamda no adda dagiti mapasungadan nga abnormal a kasasaad ti panawen babaen ti panagdengngegda idi damag iti radio ken panagbuyada iti telebision tapno mapakaammuanda iti kasasaad ti panawen nangruna ita a matutudo a tiempo.

“Kanayon a nakasagana ti PDRRMO, well-trained amin dagiti personnel, ken adun dagiti kabaruanan nga equipments-mi tapno tumulong kadagiti biktima ti kalamidad ita a tiempo dagiti layus ken bagyo,” kinuna ni Engr. Chan iti panangipanakkelna a dagiti personnel ti PDRRMO ket nagsanayda iti Water Search And Rescue Training ken addaanda kadagiti kabaruanan a lugan a makalasat kadagiti kadandanuman no mapanda agresponde kadagiti umili nga agkasapulan iti tulong.

Inrakurak ni Engr. Chan nga aminen nga ili ken siudad iti Ilocos Sur ket addaandan kadagiti bukod a DRRMO, ngem adda dagiti sumagmamano a saan a regular nga aktibo. Indariragna a nasken nga aktibo, well-trained ken well-equipped dagiti amin a DRRMO iti Ilocos Sur tapno madadaanda nga agresponde wenno umarayat no kasapulan ti tulongda.

Inlawlawagna a nasayaat ti koordinasion ti PDRRMO kadagiti amin a national government agencies no panawen dagiti didigra kas ti Department of Public Works and Highways, Department of Social Welfare and Development, Department of Health, Office of Civil Defense, Philippine National Police, Philippine Army,  Bureau of Fire Protection, ken dadduma pay nga ahensia tapno maliklikan ti overlapping ti trabaho. Binigbig ken pinagyamananna met ti nasayaat a kooperasion no panawen ti didigra ti Ilocos Sur Electric Cooperative ken dagiti local water utilities, ken dadduma pay a private institutions.   

Impalagip pay ni Engr. Chan nga iti agdama ket kasapulan ti pannakapamoderno dagiti communication equipments kas ti panagaramat iti satellite phone a nayon dagiti cellphone ken handheld radios tapno adda madadaan nga usarenda no agawan ti signal kas ti napasamak ti napigsa a bagyo idi 2018 a nagpukaw ti serbisio ti Globe ken Smart, ken natumba ti radio antenna iti kapitolio. Impakaammona a mabangonen ti radio repeater iti Cañao tapno makadanon ti radio signal iti intero nga Ilocos Sur.  

Impakaammona pay nga uray iti normal a kasasaad ti panawen ket aktibo latta ti PDRRMO nga agresponde kadagiti emergency situations kas kadagiti aksidente ti lugan a mapaspasamak kadagiti kalsada. Impalgakna nga addaanda iti ambulansia ken well-trained iti first-aid dagiti personnel-da a tumultulong nga agresponde kadagiti vehicular accidents. Inyawisna a tuladen koma dagiti amin a DRRMO iti amin nga ili ken siudad tapno makatulongda kadagiti aksidente.

Impalgakna pay a madadaan ti PDRRMO a mangbayabay iti pannakaisayangkat ti earthquake drill no adda dagiti opisina, pagadalan ken dadduma pay nga institusion nga agkalikagum a mangisayangkat iti daytoy a gannuat tapno maliklikan ti nadagsen nga epekto no adda dagiti sumangbay a napigsa a ginggined iti Ilocos Sur.

Naisayangkat ti media forum kas paset ti pannakarambak ti National Disaster Resilience Month ita a bulan tapno mapalagipan dagiti umili iti panagannad kadagiti nagduduma a didigra a kaaduanna a mapaspasamak mangrugi iti bulan ti Hulio. ●