Panagaramid instrumento ti rambak, naidagadag

SAN EMILIO, Ilocos Sur – Kanayonan a pamastrekan dagiti agnaed ditoy dagiti partuatda nga instrumento a maar-aramat kadagiti tribal festival ti ili.

Inkari ni Gov. Deogracias Victor Savellano a pagtinnulonganda ken ni Cong. Eric Singson ti pundo a maited a pangrugian dagiti umili nga agpartuat kadagitoy nga instrumento.

Inggunamgunam ti gobernador ti panangpapintas dagiti lumugar kadagiti aramidda tapno adu ti maguyugoy a gumatang.

Dinawat pay ni Savellano ti panagaramid dagiti lumugar kadagiti alikamen nga ar-aramiden idi dagiti immun-una a Bago ngem awanen iti agdama ken saanen nga ammo ti agdama a henerasion no ania ti langada. (Mancielito S. Tacadena)