Panagbaklay dagiti Pilipino iti krus ita a Semana Santa

NGILINEN ita a lawas dagiti Kristiano iti sangalubongan ti Semana Santa kas panangilagip ti panagtutuok, ipapatay ken panagungar ni Apo Jesucristo.

Kabayatan daytoy a Semana Santa, ibaklay met dagiti tattao iti sangalubongan ti nadagsen a krus gapu ti agtultuloy a panagraira ti Corona Virus Infectious Disease 2019 (COVID-19) a maibilangen a global pandemic a nangapektaren iti nasurok a maysa a million a tattao ken nangkettelen iti rinibu a biag.

Maibilang daytoy a pandemic a kadagsenan a krus wenno krisis iti lubong kalpasan ti World War II ta kalaksidan kadagiti nagadun a naakaran ken natay ket awan pay ti natakuatan nga agasna ken agtultuloy ti panagsaknapna iti nagduduma a pagilian iti lubong manipud idi naparnuay ti outbreak sadiay Wuhan City, Hubei, China idi Disiembre 2019 a mapapati a nayakar ti virus iti tao gapu ti panagsida iti paniki.

Nakaskasdaaw ta napengdanen sadiay China ti panagraira ti virus, ngem nagwaras metten iti nagduduma a pagilian uray kadagiti nabibileg ken nababaknang a nasion. Nakaskasdaaw pay ta iti agdama ket dagiti pagilian a kaaduanen ti naapektaran iti virus ket sadiay United States of America, Italy ken Spain, ket maikapat laengen ti China. 

Makapasiddaaw met ti panagadu ti naakaran iti virus sadiay USA kas kabilegan ken kabaknangan a pagilian iti lubong ket indeklaran ni US President Donald Trump nga “under the state of national emergency” gapu iti COVID-19.

Nagbalin met ti Italy nga epicentre ti COVID-19 sadiay Europa. Maladingitan ni Papa Francisco ti panagwaras ti virus iti Italy ken iti intero a lubong, ket kiniddawna kadagiti Kristiano nangruna kadagiti Katoliko, ken uray pay dagiti sabali ti pammatina nga iti daytoy a panawen ti krisis iti sangalubongan ket agkaykaysa koma dagiti tattao nga agkararag ken manglaban iti daytoy a virus.

Nagkas-ang a pasamak ti pinarnuay ti COVID-19 ta rinamaramna ti benneg ti salun-at, turismo ken ekonomia dagiti pagilian ta adu a pagilian ken lugar dagiti nag-lockdown tapno malapdan ti panagraira daytoy a virus.

Ditoy Pilipinas, nadagsen a krus ti ibakbaklay dagiti umili iti panagadu ti bilang dagiti positibo iti COVID-19, ket inaldaw a manayonan ti bilang dagiti naakaran ken matay gapu iti virus.

Uray no indeklaran ni Presidente Rodrigo Duterte ti pagilian nga “under the state of national public health emergency” ken “under the state of calamity, ken addan ti maudi a lawas ti makabulan nga enhanced community quarantine ti intero a Luzon, marikna dagiti umili ti nakaro a tuok ken rigat nangruna dagiti napanglaw ken masaksakit.

Ibilang dagiti adu a Pilipino a ti panagraira ti COVID-19 iti lubong agraman iti Pilipinas ket nadagdagsen pay nga amang ngem dagiti nagpasaran a kalamidad kas kadagiti napigsa a bagyo, ginggined ken panagbettak ti bulkan. Idi nagsagaba dagiti Pilipino iti didigra kas ti panagbettak ti Mount Pinatubo, Taal Volcano ken dadduma pay a bulkan, ti Bagyo Ompong ken Yolanda ken dadduma a natural a didigra ket adu a babaknang a pagilian dagiti simmaranay. Ngem iti COVID-19, dagiti sigud a tumultulong a nasion ket nadagsen met ti problemada iti panagraira iti virus kadagiti pagilianda.

Matuokan ken magagaranen dagiti kaaduan nga umili nga agsubli iti normal a biag ta adun kadakuada dagiti marigatan gapu iti kinakurang ti taraon ken panagdudupudopda kadagiti pagtaengan kabayatan ti makabulanton a Luzon lockdown ken community quarantine kadagiti dadduma a probinsia ken siudad sadiay Visayas ken Mindanao. Ngem saan pay a masinunuo no magibusanton dagiti lockdown wenno community quarantine kadagiti naituding nga aldaw.

Para iti Luzon enhanced community quarantine, nangbukelen ti Interagency Task Force on the Emergence of Infectious Disease iti technical working group a mangadal no rumbeng a mapaatiddog pay ti lockdown tapno nataltalged ti pannakapaksiat ti virus.

Adu dagiti mamati a masapul a mapaatiddog pay ti Luzon lockdown ta saan a masinuo ti kaadu dagiti naakaran iti COVID-19 ta limitado laeng dagiti pasiente a nagdalan iti test ket nabayag unay ti pannakaammo iti resultada. Add dagiti natay ngem saan a naammuan no positiboda iti COVID-19, ket nadagsen a problema ti “contact tracing” kadagiti nangasikaso ken nakalangenda.

Adu met dagiti mayat a saan koman a mapaatiddog ti Luzon lockdown ta naginad ti idadateng dagiti saranay kadagiti napanglaw uray no inaprobaranen ti Kongreso ti “Balikatan to Heal as One Act” a nangipaay iti special authority wenno emergency power ken ni Presidente Duterte a mangisayangkat kadagiti gannuat tapno malapdan ti panagraira ti COVID-19 ken matulongan dagiti umili nangruna kadagiti napanglaw ken napakaruan a naapektaran gapu iti lockdown iti Luzon.

Ita a Semana Santa, kas umili iti Pilipinas a mabigbig a kangrunaan a pagilian dagiti Kristiano iti intero nga Asia, ngilinenda koma dagitoy nangina nga aldaw a manglagip iti panagtutuok ken ipapatay ni Apo Jesus iti krus, ken ti panagungarna.

Kas ken ni Apo Jesus, gapu iti ayatna nga ispalen dagiti tattao iti basol, binaklayna ti nadagsen a krus, nakoronaan iti siit, naparparigat, nailansa ken napapatay iti krus, ngem nagungar iti maikatlo nga aldaw. Kadagitoy nga aldaw, adun a Pilipino dagiti marigatan gapu iti kasasaadda a ginubuay ti COVID-19, ngem kas ken ni Apo Jesus, baklayenda daytoy a krus a napnuan iti anus ken sakripisio tapno maisalakan dagiti tattao iti sakit. Iti panagungar ni Apo Jesus ket makaadaw koma iti namnama dagiti Pilipino a dagiti agtaklin iti Dios ket agungardanto met kalpasan ti ipapatay. Dayta koma ti pagubbogan ti namnama a kabaelan a parmeken ti agdama a krisis.