Panagbakuna kadagiti aso, agtultuloy

CABUGAO, Ilocos Sur – Kas paset ti gannuat ni Mayor Edgardo S. Cobangbang, Jr. a masalakniban iti rabies dagiti agnaed, impakaammo ti municipal livestock inspector nga agtultuloy ti panagpabakunada kadagiti aso ditoy nga ili.

Sakbayna, agdagup iti 100 nga aso iti Barangay Namruangan  ti binakunaan da Dr. Melvyn Castro, municipal livestock inspector ditoy nga ili, ken dagiti livestock technicians ti CJ Philippines .

Kabayatanna, idi Enero 25, bimmisita iti Cabugao dagiti beterinario ti DA-RFU I, San Fernando City, La Union a pakaibilangan da Dr. Annie Bares, Regional Livestock Banner Coordinator, DA-RFU 1, San Fernando City, La Union; Dr. Constancia Diaz, Regional Anti-Rabies Coordinator; Dr. Catherine Simon, Veterinarian 2 Provincial Livestock Banner Coordinator; ken Pedro Nano, Jr., empleado iti DA-RFU, ket nangtedda kadagiti vaccine a makabakuna iti 1,000 nga aso ditoy nga ili.

Maisayangkat daytoy a gannuat babaen ti panagbulig ti nasao nga opisina nga idauluan ni OIC Regional Executive Director, Dr. Valentino Perdido, ken ti gobierno munisipal ditoy.#