Banner News: Panagbalin a Pisay scholars dagiti grade 6 students, awis ti PSHS IRC Director | Tawid News Magazine - Weekly Ilocos News πŸ“°

Panagbalin a Pisay scholars dagiti grade 6 students, awis ti PSHS IRC Director

SAN ILDEFONSO, Ilocos Sur β€” Panagbalin dagiti agdama a Grade 6 students ken panagsagana dagiti estudiante nga agbalin a scholar iti kaprestihiosuan a science high school iti Pilipinas ket magun-odda dagiti adu a benepisio nga awan kadagiti dadduma a pagadalan.

Dayta ti kangrunaan nga awis ni Dr. Ronalee Orteza, Campus Director ti Philippine Science High School – Ilocos Region Campus (PSHS – IRC) kabayatan ti naangay a press conference iti uneg ti pagadalan idi Pebrero 7, 2020.

Inrakurak ti Campus Director nga iti dayta nga aldaw a panagrambak ti PSHS – IRC iti maika-18 a Foundation Day ket nakapatauden ti pagadalan kadagiti adu a nagturpos a maipanakkel ti panagballigida iti nagduduma a tay-ak nangruna iti medisina, siensia ken teknolohia.

Inlawlawagna nga addan dagiti doktor a taga-Ilocos Sur a nagturpos iti dayta a pagadalan ket agpapaayda kadagiti ili iti probinsia, sabali pay dagiti agserserbi kadagiti nalatak nga ospital iti Metro Manila. Impakaammona a maikanem ti PSHS – IRC iti kaadu dagiti pumaspasa iti University of the Philippines College Admission Test.

Impakaammona pay nga umad-adun dagiti taga-Ilocos Sur dagiti pumaspasa iti entrance examination ken madama nga agbasbasa iti PSHS – IHC, ken kalikagumanna nga ad-adu koma pay dagiti makastrek nga estudiante kas host province ti pagadalan. Kiniddawna kadagiti nagannak nga iduron ken tulonganda dagiti annakda nga agbasbasa iti Grade 6 iti agdama nga agaplikar ken ageksamen iti entrance test a ti aplikasion ket mangrugin iti daytoy masungad a Marso 2020.

Impakaammona ti agtultuloy a pannakabangon ken pannakapadur-as dagiti pasdek ken pasilidad iti PSHS – IRC babaen ti suporta ti National Government – ti Department of Science and Technology. Pinagyamananna met ti agtultuloy a suporta ti Provincial Government ti Ilocos Sur, ken ti Municipal Government ti San Ildefonso.

Impasingkedna a dagiti estudiante iti PSHS ket maaywananda a nasayaat ken napintas ti pannakamuli ken panagadalda gapu ta kompleto ti pagadalan kadagiti moderno a pasilidad ken alikamen, ken addaanda kadagiti nalalaing a mangisursuro.

Pinatalgedanna nga iti laksid ti kaaddan iti abay ti PSHS – IRC iti by-pass road ken opisina ti Land Transportation Office ken dadduma pay a baro a pasdek, ket nakasaganada a mangaywan iti seguridad dagiti estudiante iti pagadalan. Impasingkedna pay a kalaksidan iti panagadal dagiti estudiante ken panagnaedda iti PSHC – IRC ken maipaay kadakuada ti spiritual nourishment iti laksid ti kaadda dagiti nagduduma a relihion dagiti agbasbasa kas ti Roman Catholic, Iglesia Ni Cristo ken dadduma pay a pammati.

Nasangaili iti selebrasion ti PSHS – IRC 18th Foundation Day da 1st District Rep. Deogracias Victor Savellano, ti akin-brain child ken founder ti pagadalan a ni sigud a 1st District Rep. Salacnib Baterina, PSHS Executive Director Lilia Habacon ken dadduma pay nga opisial ti DOST ken PSHS, ken lokal a gobierno.

READ: PSHS to accept 30 more Gr 7 enrollees next SY

Nailagip iti panagrambak a manipud iti naiputputong a bassit a maysa a kadsaaran a pasdek ti campus iti abay ti natapok a kalsada iti Brgy. Poblacion East nga addaan laeng idi iti bassit a bilang dagiti first year high school students ket itan, kalpasan iti 18 a tawen, ginasuten wenno agarup sangaribun dagiti estudianteda iti Grade 7 – 12, ken nagadun dagiti nabangon a pasdek ken pasilidad iti campus. Nagdur-as metten iti asidegna ta nabangonen iti abayna ti San Ildefonso – Bantay By-pass Road ken LTO Vigan District Office ken dadduma pay a pribado nga opisina.●