Footer

PANAGBALIN NGA STATE WITNESS NI NAPOLES.

Komentario ni Eden A. Alviar

(Tuloyna)

Naibulgar pay ti panagaramat ti Aquino Administration iti pondo para ti Development Acceleration Program, wenno panaggasto dagiti senador, kongresista ken departamento kadagiti pondo a naibilang a “savings” dagiti ahensia para kadagiti programa a pinilida. Imbutaktak dayta ni Senador Estrada kabayatan ti panna-kaidarumna. Nakuestionan ti legalidad ti pondo a DAP iti Korte Suprema agingga a naideklar a mailabsing dayta iti Konstitusion.

Idi 2014, indarum ti Ombudsman iti Sandiganbayan ni Napoles iti kaso a plunder ken graft gapu iti panagbalinna a mastermind ti P10 billion pork barrel scam, kalaksidan pay ti kasona a “serious illegal detention.” Nagbalin a kang-runaan a testigo iti kaso a plunder ken graft ni Luy ken dagiti sigud nga empleada ni Napoles. Madama pay laeng ti pannakabista ti kaso iti Sandiganbayan.

Iti pannakaabsuelto ni Napoles iti kaso a “serious illegal detention,” adda dagiti eksperto iti linteg a nagkuna a makaapektar dayta iti kredi-bilidad ti testimonia ni Luy para iti kaso a plunder ken graft, ngem adda met dagiti mangi-baga a nagsabali dagiti kaso ket awan ti dakkel nga epektona iti kaso ni Napoles a mabisbista pay laeng sadiay Sandigan-bayan.

Adda dagiti maburburtiaan iti tarigagay ni Justice Secretary Vitaliano Aguirre II nga agbalin nga state witness ni Napoles iti isayangkatda a re-investigation ti pork barrel scam. Mapapati nga adda pay dagiti opisial iti Aquino administration a paset iti pork barrel scam ngem saanda a naimbestigaran wenno nai-darum gapu ta kaaliadoda iti naglabas a turay.

Kiniddaw ti kampo ni Napoles iti Sandiganbayan iti pannakayakarna koma iti nakaibaludanna sadiay Correctional Institution For Women iti Mandaluyong City iti NBI detention cell gapu iti pangta ti seguridadna. Ngem pinagkedkedan dayta ti Sandiganbayan ket imbilinda ti pannakayakarna sadiay Bureau of Jail Management and Penology Detention Center iti Camp Bagong Diwa, Taguig City.

Nagsaritan ni Ombudsman Conchita Morales Carpio a kontraenda ti panagbalin nga state witness ni Napoles ta maibilang a principal accused wenno kangrunaan nga akusado, ken saan nga isuna ti kabassitan iti basol kadagiti naidarum nga akusado. Ngem inaklon ti Ombudsman nga adda iti Korte amangikeddeng ken saanda a malapdan ti Department of Justice no irekomendada ni Napoles nga agbalin a testigo ti estado.

Mapagduduaan ti motibo dagiti maseknan nga opisial iti agdama nga administrasion ni Presidente Rodrigo Duterte a mamagbalin nga state witness ni Napoles uray pay isuna ti maibilang nga utek ken kangrunaan nga akusado kadagiti kaso a plunder ken graft. Saan ngata a maaramat laeng ni Napoles tapno ira-manna dagiti agdama ken naglabas nga opisial ti gobier-no nga adda iti oposision tapno mapastidiar ken mapasardeng-dan a komonkontra iti admi-nistrasion?

Nakakalkaldaang dagitoy a pagteng no mapalubosan nga agbalin nga state witness ni Napoles ket amangan no sinonto lattan dagiti iramanna a kakumplotna nga idiktar ti sabali. Dakkel a pangta daytoy iti pannakagun-od ti hustisia para kadagiti adu a Pilipino a nakusit dagiti imbayadda a buis gapu iti naanomalia a pannakagasto dagiti pondo ti gobierno. Mantia met dayta iti ibanbandera ti agdama nga administrasion a kampaniana a mangparmek ti kurapsion.#