Footer

Panagbomba iti Batasang Pambansa, kinondenar ni Dip. Singson

VIGAN CITY – Kinondenar ni Diputado Ronald Singson ti panagbomba iti Batasang Pambansa itay Nobiembre 13 ket indagadagna iti kapolisan ti madagdagus a pannakatiliw dagiti nagisayangkat tapno maikkan iti hustisia dagiti biktima.

“Hopefully, masolbar a sigida tapno mapasubli ti kumpiansa dagiti tattao iti gobiernotayo…” kinuna ni Singson bayat ti interbio kenkuana ni Jun Ramos iti programana a Barangay Commando Brigada sumagmamano nga oras kalpasan ti panagbomba.

Kinuna ni Singson a “nakabutbuteng ta awan metten ti piliendan (nagisayangkat) a target” uray no highly populous areas a kas iti Batasang Pambansa.

Kinuna ti diputado a ti nasao a lugar ti nakaiparadaan ti luganna ket pagyamananna ta nakaawiden sakbay ti panagbettak ti bomba.

Uppaten ti natay iti insidente a pakairamanan ni Congressman ti Basilan Wahab Akbar, Julasiri Hayudini, aide ni Akbar; Maan Gale Bustaliño, chief of staff ni Congressman ti Negros Oriental Henry Teves; ken Martial Taldo, drayber ni party-list Rep. Luzviminda Ilagan.

Walo met a tattao ti nasugatan iti insidente a pakairamanan da Ilagan ken Teves.

Kuna dagiti inbestigador a naimula ti bomba iti maysa a motorsiklo a naiparking iti asideg dagiti nakaparada a kotse iti akin-abagatan a pagparkingan iti Batasang Pambansa.

Kalkalpas ti session ket aggaawiden dagiti agilinlinteg idi bimtak ti bomba a mapapati a napabettak babaen ti selpon.

Kinuna ni Singson a “definitely, this is another destabilizing efforts against the administration” idinto nga innayonna a no destabilization efforts daytoy, dida koma inramraman dagiti tattao nga awan ti rebbengna a masugatan wenno masaktan.

Binabalaw pay ti diputado iti kinalukay ti seguridad iti Batasang Pambansa.

“Awan ti asoda, awan ti sarming a pagkitada iti baba ti sasakyan… lapse in security,” nakuna ni Singson.

Indagadagna a ma-identify insigida dagiti autoridad no sino ti akin-aramid tapno maikkan iti hustisia dagiti biktima.

Idi Oktubre 19, 11 a tattao ti natay ken nasurok a 100 dagiti nasugatan iti explosion iti Glorietta 2.

Kinuna dagiti inbestigador nga accidental gas explosion ngem saan nga inannugot dagiti operators ti nasao a pasdek daytoy a teoria.#