Panagbongbong, naipasardeng

SINAIT, Ilocos Sur – Impatalged ti dadaulo ti maysa a barangay ditoy nga ili ti panagsardengen dagiti kalugaranna nga agkalap babaen ti illegal a wagas tapno malapdan ti ibabassit ti makalapan iti kabaybayan a sakupda.

Kinuna ni Teppeng Barangay Captain Melchor Yadao nga imbilinnan kadagiti kalugaranna ti panagsardengda nga agbongbong iti kabaybayan a sakupda kas panagtungpalna iti pammilin ni Mayor Marlon Ines a maguped daytoy nga illegal a panagkalap iti lugarda.

Iti napalabas, maitudtudo a taga-Teppeng dagiti mangngalap a nagbongbong iti kabaybayan a sakup dagiti kadarappat a barangay ken ili ti Sinait.

Ngem linagidaw daytoy ni Yadao agsipud ta kas kinunana, saan amin a mangngalap nga agisaysayangkat iti illegal a panagkalap iti kabaybayan ket taga-Teppeng no di naggapuda iti sabali a barangay.#