Panagbongbong, problema iti Caoayan

CAOAYAN, Ilocos Sur – Problema ti panagbongbong iti kabaybayan daytoy nga ili ngem agparparang a saan a mapugipog daytoy agsipud ta awan ti ramit nga aramaten dagiti otoridad.

Daytoy ti limtuad iti panangiriing manen ni Konsehal Joe Llanes iti pannakasolbar ti agtultuloy a panagbongbong iti kabaybayan a sakup ti Barangay Lusong ken Villamar.

Naikiddaw iti kapolisan iti itutulongda a mangpugipog iti panagbongbong ditoy nga ili ngem insungbat ti hepeda nga awan ti bangka a pagkamatda.

Mapapati nga aggapu iti sabali a lugar dagiti mapan agkalkalap babaen ti illegal a panagbongbong iti kabaybayan a sakup daytoy nga ili.#