Panagbuis dagiti online sellers

“ANIA pagbuisennakaminton ti gobierno nga ago-online selling, napia laeng met a panguartaan tatta tiempo ti Covid, makessayan pay ti masapulan.” Dayta ti reaksion ti maysa nga agkabannuag nga ina nga “online seller” kadagiti lupot ken makan kalpasan a nakaawat iti surat manipud iti pakaibilanganna a district office ti Bureau of Internal Revenue a mangibilbilin ti panagparehistrona iti ahensia.

Nagpataud ti kasta ken pumada a reaksion kadagiti adu a Pilipino nga adda iti daytoy a baro a wagas ti negosio a panaglako iti internet wenno social media ta impaulog ti BIR.

Maibasar iti Revenue Memorandum Circular 60 – 2020 ti BIR, mapakaammuan dagiti negosio iti digital platform ket masapul nga agrehistroda iti dayta nga ahensia sakbay wenno agingga idi Hulio 31, 2020. Makidkiddaw pay dagiti online businesses nga ideklarar ken bayadanda dagiti buis dagiti naglabas a transaksionda nga awanan iti penalty no ideklarar ken agbayadda sakbay dayta a petsa. Nagballaag pay ti BIR kadagiti online sellers, indibidual wenno kompania a maduktalan nga agnegnegosio a saan nga agtungpal kadagiti requirements ket sumango iti tumutop a penalty maibatay iti linteg.

Linawlawagan ni BIR Commissioner Caesar Dulay ken dagiti opisial ti ahensia a naipatulod ti surat a mangkidkiddaw ti panagparehistro dagiti online sellers tapno maammuanda no kasano ti bilangda ken kadakkel dagiti mapaspastrekda iti dayta a klase ti negosio. Linawlawaganda nga awan ti nasken a pagdanagan dagiti babassit nga “online sellers” ta sagudayen ti pagannurotan ket saan nga agbayad iti buis dagiti kumitkita iti saan a nasursurok ngem P250,000.00 iti tinawen.

Dagiti met online sellers nga addaan iti gross receipts a P3 million agpababa ket exempted iti value-added tax.

Sadiay House of Representatives, matamtamingen iti Committee on Ways and Means ti gakat para ti panagbuis dagiti negosiante wenno kompania nga adda iti online business wenno negosio iti digital platform kas dagiti dadakkel ken ganggannaet a kompania a Lasada, Netflix, Amazon ken Google nga agganganansiada iti adu, ngem saanda met nga agbaybayad iti tumutop a gobierno ti Pilipinas. Panggep dagiti kongresista nga ikkan ti P12% Value Added Tax dagiti produkto ken serbisio nga ipapaay dagitoy a dadakkel nga online business tapno makipadada kadagiti kadawyan a kompania nga agbaybayad iti umno a buis.

Saan a mailibak ti kaadu ti mapaspastrek dagiti bigtime shopping platforms ken digital services. Gapu ta kadagitoy laeng a panawen a nauso ti “online business” kabayatan ti kaadda ti moderno a wagas ti komunikasion, ket awan ti linteg a mang-regulate kadagitoy a klase ti negosio.

Nabayagen nga uso ti “online shopping” iti Pilipinas ta adu dagiti kustomer dagiti mayat iti daytoy a wagas ti panaggatang kadagiti kasapulanda ta saandan a masapul a mapan kadagiti pagtagilakuan ken iyurayda laengen a maideliber dagiti gatangenda kadagiti address-da. Ngem timmayok ti bilang dagiti “online sellers” kabayatan ti pannakaisayangkat ti enhanced community quarantine wenno lockdown iti Luzon ken dadduma pay a lugar iti Pilipinas tapno malapdan ti panagwaras ti Coronavirus 2019.  Dandani amin a kangrunaan a kasapulan nangruna dagiti taraon ket magatang babaen iti “online” iti panawen ti lockdown. Ultimo karne, ikan, merienda ken dadduma a banag ket naglatak a negosio ita a panawen dagiti community quarantine ta dagiti naawanan iti pagtrabahuan ket dayta ti sinerrekda a negosio ta mapalubosan met a rummuar dagiti agideliber iti makan kas “essential goods.” Nagangayanna, uray dagiti adda trabahona, simrekda metten iti online business kas sideline wenno part-time job. Saan a mailibak a kalaksidan kadagiti dadakkel ken nalatak a kompania iti online business ket adu nga “online sellers” dagiti dimmur-as ti panagbiagna nangruna kadagiti aglaklako kadagiti nangina a banag kas kadagiti kotse, house and lot, condominium ken dadduma pay a sanikua a mabalin a mailako babaen iti online transaction.

Saan a tagtagibassiten ti masapulan dagiti adda iti online business ta iti apagapaman a naballigi a transaksion ket posible a daddakkel nga amang ti maganansiada wenno masapulanda ngem dagiti kadawyan nga empleado.

No man adu dagiti komontra iti panagbuis dagiti online sellers, Adu met ti pagsayaatanna no agrehistro iti gobierno ken ma-regulate ti operasion dagitoy a negosio tapno maikkan iti naan-anay a proteksion dagiti aggatang wenno consumers. Adu dagiti maaw-awat a report ti Department of Trade and Industry a reklamo dagiti saan a kontento a kustomer kadagiti nagatangda a banag iti online shopping. Adda dagiti nagduma ti kalidad iti inorderda ken ti naideliber kadakuada. Ibalbalakad ti DTI a kalintegan ti kustomer a saan a bayadan ti inorderna no saan a kontento iti gatangenna. Ngem no saan a kayat ti kustomer ti agreklamo, bayadanna lattan ti gatangenna.

Napateg ti panagbuis iti gobierno nangruna ita a panawen nga agkurkurangen ti mapastrek a buis ken ingreso gapu kadagiti adu a nagserra a negosio gapu iti Covid-19. Saan koma a sakiten dagiti adda iti online business a dakdakkel ngem P250,000.00 iti tinawen ti maganansiada ta tulongdan dayta ti pannakaparegta ti kompania.

Rebbengna a saanen a pagbayaden ti gobierno iti buis dagiti small time nga “online sellers” ta napia laeng nga adda met pamastrekanda iti panawen a nadalen ti ekonomia tapno adda pangbiagda kadagiti pamiliada. Tulongan ketdi koma ida ti gobierno a mangpadur-as ti negosioda tapno no umasenso ti kalidad ti panagbiagda ket makaipatakderda iti nadurdur-as a negosio ket ad-adunto pay ti maitulongda a mangpabaknang ti ekonomia.