Panagdur-as ekonomia ti Vigan City, naka-anchor iti heritage conservation, turismo: Mayor Eva

VIGAN CITY – Naka-anchor ti economic development daytoy a siudad iti heritage conservation ken tourism development, segun ken ni Mayor Eva Marie S. Medina.

Kinuna ti mayora a daytoy ti ikkan ti gobierno ti siudad iti dakkel nga importansia iti sumaruno a tallo a tawen.

Kanaig daytoy, sabali pay a dakkel a proyekto ti gobierno ti siudad, ti Conservation Center, ti maipatakder iti San Julian Sur, daytoy ti naammuan ti Tawid News itay nabiit.

Kinuna ni Konsehal Juan Carlo Medina, buklen ti innem a pasdek ti nasao a conservation center, dua a museo, maysa a technical school, administrative building, warehouse a pakaikabilan dagiti produkto dagiti agbasbasa iti Eskwela Talyer, ken maysa nga otel.

Kinuna ni Medina a gapu ta dakkel ti mabusbos iti nasao a proyekto, agkiddawdanto iti tulong manipud kadagiti senador.

Impanamnama metten da Cong. Ronald Singson ken ni Gov. Ryan Singson iti tulongda iti nasao a proyekto.#