Panagimbestigar ti NBI iti pannakapapatay ti balasitang, kalikaguman ni Gov. Singson

Police crime scene

VIGAN CITY – Nasken ti naing-inget a pannakaimbestigar iti napasamak a kaso a pammapatay, panagrames, panagmolestia kontra kadagiti dua a suspek a polis, babaen ti National Bureau of Investigation, tapno maikkan ti hustisia dagiti biktima.

Dayta ti pinasingkedan ni Ilocos Sur Governor Ryan Luis Singson iti media kas reaksionna iti napasamak a kaso ti pammapatay, panagmolestia, ken panagrames maikontra kadagiti dua a kameng ti Philippine National Police a sigud a nakadestino sadiay San Juan Municipal Police Station, San Juan, Ilocos Sur.

Impalgak ni Gov. Singson nga agimbestigar latta ti PNP iti kaso dagiti polis ngem nasaysayaat no agimbestigar pay ti NBI tapno nataltalged ti pagbanagan ti kaso, ken maliklikan ti panagdudua dagiti umili iti pagturongan iti imbestigasion.

Impasingked pay ni Gov. Singson ti suportana iti pannakatunton ti hustisia ti balasitang a napapatay, ken ti kasinsinna a biktima ti panagrames, a dagiti suspek wenno maatap a nangisayangkat iti krimen ket da Police Staff Sergeants Randy Ramos ken Marawi Torda.

Maibasar iti report, napasamak ti pannakapapatay ti balasitang nga agtawen iti 15 sadiay Brgy. Daclapan, Cabugao, Ilocos Sur idi pasado alas-sais iti sardam ti Hulio 2, 2020 kabayatan ti panagawidda kaduana ti ulitegna ken adingenna a nakalugan iti motorsiklo idi dungparen ida ken paltogan ti nagmotorsiklo a gunman.

Naireport a kagapgapu ti biktima ken dagiti kaduana iti Cabugao Municipal Police Station a nang-follow up iti reklamoda kontra kadagiti dua a polis.

Sakbay ti pammapatay, nagipila ti biktima ken ti kasinsinna nga agtawen iti 18 iti reklamo iti Cabugao Municipal Police Station kontra kadagiti dua a polis. Inreklamo ti biktima ti pammapatay ni Torda iti kaso a panangmolestia. Nagreklamo met ti kasinsinna kontra ken ni Ramos iti kaso a panagrames.

Segun iti reklamo dagiti biktima, sinitar ida dagiti dua a polis iti panaglabsing iti social distancing kabayatan ti idadar-ayda iti birthday party sadiay, San Juan, Ilocos Sur idi rabii ti Hunio 29, 2020. Indiaya dagiti polis nga itulodda idan kadagiti pagtaenganda, ngem sabali metten ti nangipananda kadakuada a nangisayangkatanda ti panagrames ken panagmolestia.

Iti agdama, addan dagiti dua a polis a suspek iti krimen iti restrictive custody sadiay Police Regional Office I, Camp Gen. Oscar Florendo, ken sumangsangodan iti administrative case proceeding, ken sabali pay ti criminal case a maipila kadakuada. Impasingked met ni PNP Region 1 Director Brig. Gen. Rodolfo Azurin ti seguridad ti pamilia ti napapatay a balasitang.

Adda metten sadiay Camp Crame ti biktima ti panagrames para iti naan-anay a seguridadna.

Impasingkedan ni PNP Chief Archie Gamboa a maikkat iti serbisio dagiti dua a suspek a polis ken maipakat ti umno a hustisia kadagiti biktima ti pammapatay ken panagrames.

Rinarelibuanen ni Ilocos Sur Police Provincial Director Ronald Tagao dagiti hepe ti Cabugao ken San Juan Police Station gapu iti command responsibility kabayatan ti pannakapasamak ti krimen. ●

READ MORE: