Panaginut iti koriente kadagiti opisina ti turay, indagadag ti DoE

VIGAN CITY – Indagadag ti maysa nga opisial ti Department of Energy ti panaginut iti koriente kadagiti pagopisinaan ti turay kasta met ti pannakaikabassit ti konsumo iti fossil fuel kadagiti lugan ken freon agsipud ta dakkel ti pasetda iti pannakarugit ti aglawlaw.

Dagiti fossil fuels dagiti naurnong a deposito ti hydrocarbon kas iti petroleo, coal wenno natural a gas idinto a ti freon ket sabali a nagan dagiti nagduduma a chlorofluorocarbons wenno CFCs, organiko a compound nga aglaon iti carbon, chlorine ken flourine a pagtaudan met ti methane ken ethane. Dagitoy ti kangrunaan a mangpapataud iti polusion a maitudtudo a makagapu iti panagbara ti lubong.

“Masapul (metten) nga ikabassittayo ti konsumo iti fossil fuel kadagiti lugan ken freon ta dakkel ti pasetda iti pannakadadael  ti aglawlaw,” inggunamgunam ni Efren Balaoing, agpapaay a hepe ti Luzon Field Office ti DoE.

Naangay itoy a siudad ti Seminar on Energy Efficiency and Conservation Program in Government Offices/Agencies idi Nobiembre 11 babaen ti panangilungalong ti Department of Energy.

Ditoy pay a naidagadag kadagiti nagatendar ti panagin-inutda iti enerhia ken gasolina kasta met a natratar ti agtultuloy a parikut ti panagbalbaliw ti panawen.

Karaman kadagiti napagsasaritaan iti agmalem a taripnong ti national energy and conservation program, energy conservation tips, lighting system efficiency improvements, energy conservation opportunities in refrigeration and A/C system.

Naipabuya pay ti “Panahon Na”, maysa a dokomentario mainaig iti panagbalbaliw ti klima sakbay a naipresentar dagiti topiko kadagiti partisipante.

Inggunamgunam pay ni Balaoing kadagiti nagatendar iti taripnong a nupay aglaplapusanan ti suplay ti koriente ti pagilian, masapul nga agusarda kadagiti silaw a pimmasa kadagiti pagannurotan tapno masigurado nga addaan dagitoy iti husto nga ispesipikasion ken malapdan ti posible a didigra a maparnuay gapuen iti panagusar kadagiti nababa ti klasena a bombilia.

“Saan a gapu ta nalaka, makainuttayon metten. Ta no pimmutok dagitoy ken nakaparnuay iti uram, dakdakkel metten ti pukaw nga ipaayna kadagiti opisina,” kinuna ni Balaoing.

Kasakbayanna idi Nobiembre 9-10, saggaysa a natsek-up dagiti opisina ti kapitolio ken dagiti national line agencies iti Ilocos Sur tapno makita no pumasa met laeng dagitoy iti standard ken kasta metten a naipakaammo kadakuada dagiti addang a maar-aramid tapno makainut iti koriente dagiti pagopisinaan.#