Footer

Panagiserrek iti illegal a droga iti BOC

MAPAPATAY wenno mabalud dagiti suspek nga aglaklako iti illegal a droga nga agbalor iti gasut a pisos. Ngem sibibiag ken nawaya dagiti drug lord, kameng ti sindikato, ken opisial ti gobierno a protector nga adda iti likudan ti pannakaiserrek iti Pilipinas iti droga nga aggatad iti binillion a pisos.

In-inuten a maluklukaisan ti kinapudno ti kaso ti pannakaiserrek iti Bureau of Customs dagiti illegal a droga nga aggatad iti P6.8 Billion – P11 Billion a naipalaon kadagiti uppat a magnetic lifters a nasamsam dagiti ahente ti Philippine Drug Enforcement Agency iti maysa nga abandonado a warehouse compound sadiay ili ti General Mariano Alvarez, Cavite idi Agosto 10, 2018. Nayon daytoy dagiti natiliw a droga a naglaon iti dua a magnetic lifters sadiay Manila International Container Terminal idi Agosto 7, 2018. Immunan nga impalgak ti PDEA a mapapati a P6.8 Billion ti gatad dagiti droga, ngem naipangato iti P11 Billion ti mapattapatta a gatadna kalpasan ti panagamirisda iti kadagsen dagiti nakaikargaanda a magnetic lifters.

Kabayatan ti pannakasamsam dagiti magnetic lifters, inrakurak ni PDEA Director General Aaron Aquino, a dagitoy ket naglaon iti illegal a droga ken nayon dagiti immunan a nasamsam iti BOC. Nagbasaranna ti panagpada ti disenio ken langa dagiti nasamsam a lifters iti Cavite ken dagiti natiliw a lifters iti BOC, ti reaksion dagiti nasanay a K9 dog nga agsaep iti illegal a droga ken dagiti nabati a chemical residue iti magnetic lifters.

Immuna a pinaglibakan met ni BOC Commissioner Isidro Lapeña dagiti magnetic lifters ket naglaon iti droga. Kinanunongan met ni Presidente Rodrigo Duterte a saan nga illegal a droga ti linaon dagiti magnetic lifters a nasamsam ti PDEA idiay Cavite ta awan ti natibker nga ebidensia.

Dayta a kaso ket pinataudna ti saan a nasayaat a panaglangen dagiti mangidaulo ti PDEA ken BOC nga agpada a retirado a heneral. Tinakderan ni Aquino a dagiti magnetic lifters ket naglaon iti droga a gapu ti immaduan ti supply a mailaklako kadagiti nagduduma a paset ti Metro Manila ken dadduma pay a lugar iti pagilian, kas ipaneknek ti kaadu dagiti narekober a droga kadagiti naglabas nga illegal drugs operations ti PDEA ken Philippine National Police.

Kinanunongan met ni Customs Deputy Collector Ma. Lourdes Mangaoang nga illegal a droga ti linaon dagiti magnetic lifters a nasamsam sadiay Cavite kas maibasar iti resulta dagiti x-ray idi maiserrek dagiti kontrabando iti BOC. Ngem impatangken ni Lapeña a dagiti magnetic lifters ket saan a naglaon iti illegal a droga, ken inakasuranna ni Mangaoang a makikumkomplot iti sindikato ti droga tapno dadaelenda ti reputasionna a BOC Commissioner.

Nagbaliw ti pagtaktakderan ni Lapeña a saan a naglaon dagiti magnetic lifters iti droga kalpasan ti panagtestimonia iti House of Representatives da Aquino, Mangaoang, Jaime Guban a sigud a Customs Intelligence Officer a nangaklon a pinalusotda dagiti magnetic lifters a naglaon iti kontrabando.

Iti dayta nga inbestigasion, pinespes da Cong. Romeo Acop ken Cong. Ace Barbers da Mangaoang, Guban ken Lapeña. Nairakurak ti tarigagay ni Guban nga agbalin nga state witness kontra kadagiti dadduma nga adda pannakainaigna iti illegal a droga karaman dagiti sigud nga opisial ti BOC, PDEA ken PNP.

Immunan a na-contempt ni Guban iti Senate Investigation ti Blue Ribbon Committee nga idauluan ni Richard Gordon gapu ti panagulbodna.

Immandaren ni Presidente Duterte iti National Bureau of Investigation ti panangarestoda ken ni Guban kalpasan ti panagtestimonia iti House of Representatives. Minandar ti Presidente ti PNP nga arestarenda ni Guban, ken ipanda iti National Bureau of Investigation tapno maimbestigar. Impasingked ni Gordon a saan a mabalin a maarestar ni Guban kabayatan nga adda iti ikut ti Kongreso ta kas na-contempt a resource person iti imbestigasion nga isaysayangkatda ket agtalinaed iti kustodia ti Senado. Impalgakna ti panangrespeto koma ti Presidente ti Executive Branch ti Kongreso wenno Legislative Branch kas co-equal body. Inrakurakna ti panangipasadan iti report ken rekomendasion ken ni Senate Presidente Vicente Sotto III a panangiyulin iti kaso iti Department of Justice kadagiti adda pannakainaigna iti pannakaiserrek ti illegal a droga iti BOC.

Nakalkaldaang ti pannakaiserrek iti BOC dagiti binillion ti gatadna a droga. Idi Mayo 2017, nasamsam iti BOC ken bodega iti Valenzuela, Metro Manila dagiti droga nga aggatad iti P6.4 Billion babaen ti PDEA nga idauluan idi ni Lapeña. Gapu iti dayta a kaso, naeskandalo ti BOC a gapu ti nakapuersaan a naglusulos a Commissioner ni Nicanor Faeldon, ken dagiti kakaduana a mapapati nga adda pannakainaigna iti pannakaiserrek dagiti droga. Naisawsaw pay iti kaso iti imbestigasion ti Senado dagiti dadduma nga opisial ti gobierno ken ti anak ken manugang ti Presidente, ngem naabsueltoda gapu ti kinakurang ti ebidensia.

Dinutokan ti Presidente ni Lapeña a simmukat ken ni Faeldon iti BOC ta kas sigud a Director General ti PDEA ket malapdanen a mamimpinsan ti pannakaiserrek ti illegal a droga kadagiti puerto. Nadutokan met a simmukat ken ni Lapeña ni retired Chief Supt. Aquino, sigud a Central Luzon Police Director a naglatak gapu kadagiti adu a nagapuanan iti pannakatiliw dagiti laboratorio ken sindikato ti droga iti nasakupanna.

Kabayatan ti ibabaaw ti immuna a kontrobersia ti pannakaiserrek ti illegal a droga idi 2017, adu dagiti nasdaaw ta dagiti opisial nga adda panagbabay-a wenno posible nga adda pannakainaigna iti pannakaiserrek dagiti droga nga aggatad iti P6.4 Billion ket imbes a naikkatda iti gobierno wenno nadusada, kas ken ni Faeldon, ket nayakar laeng iti sabali nga ahensia, kas Deputy Administrator iti Office of Civil Defense, ket itan kas Director ti Bureau of Corrections, a nakaibaludan dagiti adu a drug lords a mapapati nga agingga ita ket konektado pay laeng iti agtultuloy nga illegal drug trade.

Iti kaso ti P11 Billion ti gatadna nga illegal a droga a naipuslit iti BOC, inyanunsion ni Duterte ti pannakasukat ni Lapeña kas BOC Commissioner babaen ken ni retired General Rey Leonardo Guerrero, sigud a Chief of Staff ti Armed Forces of the Philippines. Mayakar ni Lapeña kas baro a Director General ti Technical Education, Skills and Development Authority kasukat ti naglusulos ta agkandidato iti eleksion. Immandar pay ti Presidente ti pannakaikkat iti puesto wenno floating status dagiti amin a department heads iti BOC ken masukatanda babaen kadagiti aggapu iti AFP wenno Coast Guard.

Makaupay dagitoy a mapaspasamak iti gobierno ta imbes a maikkat ti agdadata a nagliway iti akemna a mayataday iti prinsipio ti “command responsibility” ket mayakar wenno maingato pay ti saadna iti sabali nga ahensia.

Nakalkaldaang nga iti laksid dagiti rinibun a nakettel a biag dagiti napanglaw ken awanan-gaway iti kampania ti gobierno kontra illegal a droga, ket saan a mapakpaksiat daytoy a problema nga inkari idi ti Presidente idi panawen ti kampania a parmekenna iti las-ud ti tallo agingga iti innem a bulan. Nasuroken a dua a tawenna iti turay, ngem agtultuloy ti panagraira daytoy a peste ti kagimongan. Nakadakdakes ta uray no rinibribun dagiti napapatayen iti kampania kontra droga, sibibiag ken siwawaya met dagiti didiosen nga agnegnegosio ken dagiti agpapaay ken opisial ti gobierno a kakumplotda. (Eden Alviar)