Footer

Panagitantan

“SUKATAM met ti sapatosnan a!” nagmisuot pay ti amana ta kapaminlimanan nga imbalakad dayta ken ni Dencio.

“Mabalin pay dayta… “

“Dika la maasianen iti kabaliom…”

“Aramidekton no sumangpetak.”

“Papanam?”

“Sumalogak. Innak aggatang iti kasapulanmi…”

“Sakayam dayta kabaliom?”

“Adda aya sabali a pagsakayan ket awan met…Alangan met a magmagnaak…” inyillek pay ti nasutil nga anak.

“Sapay ngarud a dika sinukatan dayta sapatosna?”

“Mabalin pay dayta…”

“Nagingpisen! Maluklukuab payen. No maikkat ti sapatosna, amangan no matikleb pay. Sika met laeng ti agrigat.”

Ngem saanen nga inkaskaso ti anak ti amana.

Parbangon pay laeng ngem nagrubuaten ni Dencio. Awan ti dyip iti kabambantayan a lugarda. Kabalio ti maaramat a transportasion no agisalogda kadagiti produktoda. Agarup uppat a pulo a kilometro ti kaadayo ti kabisera ken nakurang a duapulo a kilometro iti ili.

“Nalukuab metten ti maysa a sapatosna, pari, dika pay la aya sukatan,” kinuna ni Mario a dimmagasanna a nammigatan.

“Idiayton, ili, pari…”

“Adda met ni Lakay Gorio a sapatero, dika pay la dumagas.”

Linabasanna ti balay ti lakay nga agikabkabit ken agpampanday iti sapatos ti kabalio ta agdardaras. Mapan pay ngamin idiay kabisera. Amangan no maamitanton nga agawid. Narigat ti masipngetan iti puseg ti kabambantayan.

Tallo pay ti nangdillaw kenkuana a sapatosanna pay ti kabaliona santo agbiahe. Ngem saan a dimngeg ni Dencio.

Alas kuatro iti malem. Iti kumalipkip a desdes a nabato, naitibkol ti kabalio. Natulatid. Sa natnag iti derraas.

Nagpaarayat iti kaasitgan a purok. Ngem natayen ti kabaliona a nadatnganda iti tukot ti derraas.

“Awan met gayam ti maysa a sapatosna. Maikaglis a,” dinillaw ti maysa a lakay.

Saanen a nagtimek ni Dencio. Ammona a basolna. No saanna koma nga intantan ti panangsapatosna iti dinguenna, saan koma a napasamak dayta kenkuana.

Nagnagna a nagawid…

No dadduma, daydiay maaramidtayo iti agdama, no apay ketdi a maitantan pay. Lalo no sumapit ti panagdardaras. Panangkamakam iti oras.

Ngem iti panangitantan iti maysa a banag ket posible met a mitsa ti ad-adda pay a saan a pannakatungpal iti maysa a panggep.

Adu dagiti banag a maitantantan. Saan laeng nga aramid no di pay dagiti pagrebbengan ken karbengan.

Maibilang a saan a panangasikaso no di man panangtallikud iti aramid ti panangitantan iti pagrebbengan.

Iti sabali a bangir, ti panangitantan iti maysa a banag, kas iti hustisia ket kaipapananna met laeng ti saan a panangited.

Kadagiti amin a negatibo a kapanunotan, agnanayon daytoy a panangitantan a nakasallabay iti amin a panggep, karbengan ken pagrebbengan.#