Footer

Panagkampo ti PA kadagiti barangay, kinondenar ti IHRA

VIGAN CITY – Kinondenar ti maysa a human rights group ti panagkampo dagiti soldado kadagiti barbarangay ditoy probinsia a mapapati a mangipapaay iti amak kadagiti umili.

Iti maysa nga statement, kinondenar ti Ilocos Human Rights Alliance (ihra), regional chapter ti Karapatan, ti panagkampo ti militar nangruna dagiti kameng ti 81st Infantry Battalion, Philippine Army iti Barangay Bugnay, Candon City nangrugi idi Septiembre 15 daytoy a tawen kas paset ti Oplan Bayanihan ni Pres. Benigno Aquino III a mapapati a nagresulta iti “nalabes a panagbuteng dagiti umili nangruna dagiti babbai ken ubbing” gapu iti  “adu a kaso ti panaglabsing iti karbengan-tao a naaramiddan kadagiti komunidad ditoy Ilocos”.

Segun iti IHRA, “kas (met laeng) kadagiti naglabas a kameng ti Philippine Army, nagkampoda met laeng kadagiti barangay iti Ilocos Sur kas kadagiti ili iti Candon, Sta. Lucia, ken Sta. Cruz, Ilocos Sur” ket “kadawyan a paggiananda ti pampubliko a pasilidad kas iti barangay hall, day care ken health centers”.

Kinuna ti surat a “nabayagen nga agrekreklamo dagiti umili iti panaggian dagiti militar iti komunidadda gapu ta “maapektaran iti gagangay a panagtignay ken malaplapdan dagiti baseran a karbengan dagiti umili idinto nga  “agipaspasaknap met (soldado) iti madi nga aramid lalo kadagiti agtutubo gapu iti panaginomda”.

“Segun ti katulagan iti gobierno ti Pilipinas ken iti National Democratic Front of the Philippines (NDFP) a Comprehensive Agreement on the Respect for Human Rights and International Humanitarian Law (CARHRIHL), “Part 4, Art. 12: Ti sibilian a populasion ket addan ti karbenganda a masalakniban kontra kadagiti risgo ken peggad nga ited ti kaadda dagiti kampo ti militar kadagiti sentro nga urban ken dadduma pay a lugar nga adu’t taona”, kinuna ti surat.

“Nalawag nga iti panagkampo ti militar kadagiti komunidad ket panaglabsing ti karbengan-tao ken internasional a makatao a linteg,” kinuna ti IHRA sana dinakamat ti napasamak a dakkel nga operasion ti militar iti Conconig East, West, Pila East ken Sapang a nakagudasan ni Elmer Valdez.

Itudtudo pay ti grupo ti 7th ID  nga akinresponsible iti pannakapukaw da Sherlyn Cadapan, Karen Empeno, Jonas Burgos ken dadduma pay a mannalon idi panawen ni Jovito Palparan.

Kinuna ti grupo  nga “adu pay a panaglabsing ti namnamaentayo aginggana nga agtaltalinaed dagiti militar kadagiti komunidad ti Ilocos” sana kinarit dagiti umili a saanda nga agbuteng, ken tumakderda para iti karbengan-tao ken para iti hustisia”.#