Panagkasarda ken Dina Bonnavie, kinumpirma ni Vice Gov. DV

CABUGAO, Ilocos Sur – Kinumpirmaran ni Vice Governor Deogracias Victor Savellano a nagkasardan ken ni Ms. Dina Bonnavie, nalatak nga artista iti telebision ken pelikula, kas naipadamag iti warnakan itay nabiit.

“Uray siak, nabasakon… isu daydiayen,” insungbat ni Savellano idi masaludsod kenkuana no agpayso ti damag a nagkasardan ken ni Bonnavie.

Inladawan pay ni Savellano ti asawana a “kumpletos rekados”.

Nadakamat ni Oyo Sotto, anak da Bonnavie ken ni Vic Sotto, nalatak a host, ken komediante iti telebision ken pelikula, bayat ti maysa a taping ti Valiente, maysa a soap opera, a nagkasaren babaen ti civil wedding ti inana ken ni Ilocos Sur Vice Governor Savellano.

Naipablaak ti nasao nga interbio iti People’s Journal online.

Segun ken ni Oyo Sotto, “weird” ti nariknada ken ni Danica Sotto-Pingris a manangenna idi saksianda ti panagkasar ti inada ken ni Savellano a naangay iti Antipolo Regional Trial Court idi Marso 28.

Iti dayta met laeng nga interbio, nakuna ni Oyo Sotto a dina ammo no naammuanen ti amada a ni Vic Sotto ti panagkallaysa ti inana ken ti bise gobernador.

Nadakamat pay ni Oyo Sotto  a “weird” ti nariknana idi makitana dagiti annak ti bise gobernador ngem maragsakan ta umad-adu ti pamiliada.

Adda dua nga annak ni Bonnavie ken ni Vic Sotto idinto nga uppat ti annak ni Vice Gov. Savellano, tallo a babbai ken maysa a lalaki,  ken ni Rita Heredia.

Innayon ni Sotto nga adda bassit a panagamakna iti pannakikallaysa manen ti inada agsipud ta dida kayat a masaktan daytoy ngem timmalged ti riknana agsipud ta “matino at mabait naman” ti siumanda ken dagiti annakna.

Iti immun-una nga interbio ti media ken ni Bonnavie, inannugotna a natnag ti riknana ken ni Vice Gov. Savellano agsipud ta adu dagiti agpada a paginteresanda kasta met iti pannakakitana iti regget daytoy a mangtulong kadagiti kailianna.

“Tall, dark and handsome,” nakuna pay ti aktres idi iladawanna ti agrayo kenkuana.

Nangrugi a naawis ti kuriosidad dagiti agindeg ti probinsia idi masansan a makitada a maisar-ong ni Bonnavie iti Cabugao, ili a pagnaedan ni Vice Gov. Savellano, ken iti masansan a panagkuyogda kadagiti pasken nga atendaran ti bise gobernador, kas iti “Panagsubli iti Napalabas” party a naangay bayat ti selebrasion ti Kannawidan Festival a nagkawes dagiti timmabuno iti pagan-anay idi tiempo ti Kastila ken idi pinasiarda ti Balay Taripato no sadino a nagibunong dagiti dua iti CD a nakaipalaonan dagiti kanta ti bise gobernador nga Ilokano.#