Panagkaykaysa dagiti Pilipino iti 2020

KAASMANG ti panangpasangbay iti Baro a Tawen ti kararag dagiti Pilipino ken ni Apo Dios nga ita a Tawen 2020 ken rugi ti baro a dekada ket agbalin a nakappia ken nadur-as ti panagbiag babaen ti panagkaykaysa dagiti umili ken lider ti gobierno.

Narigat ti naglasatan dagiti Pilipino iti naglabas a tawen gapu kadagiti nagadu a kurapsion ken kontrobersia iti gobierno a pinakaro ti agtultuloy a panagsisina ken saan a panagkikinnaawatan dagiti opisial ti gobierno. Uray iti maudi a paset ti Disiembre 2019 ket kimmamakam dagiti nagsasaruno a didigra ken trahedia a nakaibuisan dagiti adu a biag ken nakadangran dagiti adu a Pilipino, ken nadadaelan dagiti napateg a sanikua.

Dinuprak ni Bagyo Ursula ti Southern Luzon ken paset ti Visayas a nakatayan dagiti nasurok a 50 a tattao. Saan pay a naan-anay a nakabangon dagiti biktima idi 2013 ni Bagyo Yolanda iti Leyte ken Samar ngem binasnotan manen ni Ursula dagita a probinsia a nangibati iti nakaro a didigra.

Nasabidongan met dagiti adu a tattao sadiay Laguna gapu iti panaginumda iti arak a lambanog ket natay dagiti 16 a tattao gapu iti ramen a Methanol. Sabali pay dagiti napapatay iti panagatake dagiti rebelde a komunista sadiay Visayas, ken panagbomba dagiti terorista sadiay Mindanao. Adda met latta dagiti nasugatan gapu kadagiti panagpaputok iti panangpasangbay iti Baro a Tawen a kaaduanna ket gapu kadagiti legal a firecrackers.

Nagkas-ang dagitoy a pagteng ta imbes nga agragragsak koma dagiti biktima ken dagiti pamiliada iti Panawen ti Paskua ken panangpasangbay iti Baro a Tawen, ngem nakettel ti biag dagiti adu a Pilipino ken nagpanes met dagiti pamiliada ken ipatpategda iti biag.

Iti sango dagitoy a naladingit a pagteng ket kasapulan a sanguen dagiti Pilipino dagiti adu a karit ken pannubok iti 2020 a napnuan iti kired, namnama ken regta tapno agbaliw ti turongen ti panagbiag. Nasken a makaadaw dagiti umili iti adal kadagiti padasda iti naglabas tapno agbalin a pagulidananda iti agdama ken iti masakbayan.

Laglagipen koma dagiti umili a dagiti napigsa a bagyo kas ti napalabas nga Ursula a nangbasnot iti Pilipinas iti aldaw ti Paskua ket bunga ti Climate Change wenno Global Warming gapu iti agtultuloy a pananangdangran dagiti tattao iti nakaparsuaan ken pannakasabidong ti angin gapu iti kinaranggas dagiti tattao. Agtultuloy ti pannakapukan dagiti kayo kadagiti kabakiran a mangsipsip iti sabidong ti angin. Agtultuloy iti nakaro a panagpaasuk gapu kadagiti agandar a makina ken panagpuor. Agtultuloy ti kinaawan iti disiplina dagiti dadduma nga umili iti panagibelleng iti basura kas ipaneknek dagiti nasurok a 30 a tonelada a basura nga imbati dagiti napan nagrambak iti Paskua ken nangpasangbay iti Baro a Tawen sadiay Rizal Park wenno Luneta iti Manila. 

Napasamak manen ti naggigiddan a pannakasabidong dagiti adu a naginum iti arak a lambanog gapu iti kinamanagliway dagiti maseknan nga ahensia ti gobierno a nang-regulate ken nangbayabay iti agar-aramid iti dayta a klase iti arak manipud iti tubbog ti ubod ti niog iti laksid nga adun dagiti napasamak a pannakasabidong dagiti naginum iti lambanog kadagiti nagkauna a tawen. Saan a rehistrado iti Food and Drugs Administration ti lambanog nga ininum dagiti nasabidongan iti Methanol. Saan a naleksionan ti gobierno kadagiti insidente ti pannakasabidong iti lambanog dagiti umili kadagiti naglabas a tawen.

Nakaam-ames ti gapuanan dagiti rebelde ken terorista nga awanen ti panawen a pilienda tapno makaiwayatda iti dakes a panggepda a nanggundaway met iti panagliway dagiti puersa ti gobierno gapu iti ceasefire agreement iti Panawen ti Paskua.
Rinibun a biag dagiti nakettel kabayatan iti 51 a tawen a rebelion nga isaysayangkat dagiti komunista. Naikkaten ti Martial Law sadiay Mindanao idi agtapos iti 2019 iti laksid ti agtultuloy a pangta ti terorismo. 

 Namin-adun a nagdeklarar ti gobierno iti all-out war konta kadagiti iti New People’s Army ken dagiti terorista nga Abu Sayyaf Gruop, ngem agingga ita ket saanda a mapakpaksiat. Panawenen a maisubli ti peace agreement iti gobierno ken dagiti komunista, ken pannakarebbek ti ASG tapno agarin ti kappia iti pagilian.

Naladingit ti nasapamak nga aksidente ti lugan sadiay Singapore a nakatayan ken nakasugatan dagiti Overseas Filipino
Workers, ken ti pannakaabuso ken pannakatay ti maysa a babai nga OFW sadiay Kuwait. Dagitoy nga OFW ket napanda nagtrabaho iti ballasiw-taaw gapu iti agtultuloy a kinakurang iti pagtrabahuan iti pagilian. 

Nagkas-ang a panunoten nga adu latta dagiti nadangran a biktima ti panagpaputok iti panangpasarabo iti Baro a Tawen iti laksid ti kampania ti Department of Health kontra ti panagpaputok kadagiti dadakkel a palibang agraman ti indiscriminate firing iti paltog. Nakalkalddaang nga adda latta dagiti naglabsing pakairamanan dagiti polis ken soldado.

Panagkaykaysa dagiti Pilipino tapno magun-od ti kappia ken panagdur-as ti Pilipinas ti kiddaw ken awis da Presidente Rodrigo Duterte ken Bise Presidente Leni Robredo a nagsina ti partidoda iti politika. Nasken ti panagkaykaysa dagiti Pilipino nangruna dagiti opisial ti gobierno tapno magun-od ti nailian a tarigagay ita a 2020.